Nyu York hayvonot bog‘i pingvin va jirafalar tomonidan chizilgan rasmlarni kimoshdi savdosiga qo‘yadi

Nyu York hayvonot bog‘i o‘zining ijtimoiy tarmoqlardagi sahifalarida pingvinlar, jirafalar, yalqovlar, kapibaralar va boshqa hayvonlar tomonidan yaratilgan san’at asarlarini e’lon qildi. Ushbu rasmlar gala-auksionda sotuvga qo‘yiladi, deb xabar bermoqda UPI nashri.

“Rassomlarimiz Animal Art Auction kimoshdi savdosi uchun o‘z durdonalariga so‘nggi pardozni berish ustida astoydil mehnat qilmoqda”, — deb ta’kidlanadi xabarda.

Hayvonot bog‘i xodimi Mikaila Konvey ijodiy jarayon haqida so‘zlab berdi. Uning aytishicha, rasm chizish hayvonlar uchun nafaqat rivojlantiruvchi mashg‘ulot, balki ko‘ngil ochish va his-tuyg‘ularini ifoda etish usuliga ham aylangan. Ammo baribir ularga qo‘shimcha motivatsiya kerak bo‘lgan. Masalan, pingvinlarga mazali yegulik va’da qilinganda yoki lazer ko‘rsatkich bilan yordam ko‘rsatilganida, ular rasm chizishga jiddiy yondashgan.

“Bizning pingvinlarimizni ham rasm chizishga undashning eng oson usuli — ularga ovqat berish”, — dedi Konvey.

“Dream Big Gala: Night Out on the Town” nomli katta kimoshdi savdosi 15 mart kuni o‘tkaziladi. Lotlar sifatida hayvonlar chizgan san’at asarlari taqdim etiladi. Hozirda ijtimoiy tarmoqlarda asarlarning dastlabki ko‘rik-tanlovlari o‘tkazilmoqda. Kimoshdi savdosi onlayn shaklda ham bo‘lib o‘tadi, to‘plangan mablag‘ esa hayvonot bog‘i va jonivorlarning ehtiyojlariga sarflanadi.