Shimoliy Makedoniyadagi tungi klubda yuz bergan yong‘in oqibatida kamida 50 kishi halok bo‘ldi

Shimoliy Makedoniyadagi Kochani shahrida joylashgan diskotekada yuz bergan yong‘in oqibatida kamida 50 kishi halok bo‘ldi. Bu haqda mamlakat IIVdagi manbalariga tayanib, MIA agentligi xabar berdi.

Ichki ishlar vazirligi hozircha rasmiy bayonot bermagan, ammo o‘nlab jabrlanuvchilar shaharning turli shifoxonalariga yetkazilganini tasdiqlagan.

Qayd etilishicha, fojia yuz bergan vaqtda binoda 1,5 mingga yaqin odam bo‘lgan. Yong‘in mahalliy vaqt bilan soat 03:00 larda boshlangan. Taxminlarga ko‘ra, yong‘in DNK guruhining konserti vaqtida pirotexnika vositasidan foydalanilgani sabab kelib chiqqan.

Hodisa joyiga bosh vazir Xristian Mitskoski va hukumat a’zolari yetib kelgan. Qutqaruv xizmatlari mahalliy aholi bilan birga yong‘in oqibatlarini bartaraf etmoqda.

Mahalliy «Vecher» nashrining ma’lumotlariga ko‘ra, konsert o‘tkazilgan tungi klub egasi qo‘lga olingan. Shuningdek, IIV tadbir tashkilotchilarini ham so‘roqqa chaqirgan.