Milliy tibbiyot markazida komadagi bemorga jigar ko‘chirib o‘tkazildi

Toshkent viloyatida tug‘ilgan 65 yoshli bemor bir necha yildan buyon jigar sirrozi, fibroz, asid, portal gipertenziya va qizilo‘ngach venalarining varikoz kengayishi kabi og‘ir kasalliklar bilan kurashib kelgan. Bir qancha shifoxonalarda davolanganiga qaramay, bemorning ahvoli tobora yomonlashib, Milliy tibbiyot markaziga murojaat qilishga majbur bo‘ldi.

Markaz shifokorlari, jumladan, tajribali transplantolog Jasur Sobirov boshchiligidagi jamoa bemorni to‘liq tekshiruvdan o‘tkazib, unga jigar transplantatsiyasi zarurligi haqida qaror qabul qildi. Biroq operatsiyaga tayyorgarlik jarayonida bemorning ahvoli keskin yomonlashib, ensefalopatiya sababli koma holatiga tushib qoldi.

Bunday hollarda jarrohlik amaliyoti o‘ta xavfli hisoblanadi. Biroq Markaz shifokorlari bemorning hayotini saqlab qolish uchun yuksak professionallik va jasorat bilan harakat qildi.

«Jigar transplantatsiyasi uchun faol donor kerak edi va bemorning 25 yoshli qizi hech ikkilanmasdan onasi uchun donorlik qilishga qaror qildi. Bu nafaqat katta jasorat, balki insonparvarlikning yuksak namunasidir!

Shifokorlar bemor komada bo‘lishiga qaramay, jigar transplantatsiyasini amalga oshirishga qaror qildi. Bir necha soat davom etgan murakkab operatsiya muvaffaqiyatli o‘tkazildi va bemorning hayoti saqlab qolindi.

Eng hayratlanarli jihati shundaki, bemor bir sutka ichida ongiga qaytdi va o‘zini ancha yaxshi his qila boshladi!

Aytish kerakki, bunday noyob holatlar tibbiyotda kamdan-kam uchraydi. Milliy tibbiyot markazi shifokorlari esa o‘zining yuqori malakasi, tajribasi va tezkorligi bilan qiyin vaziyatlarda ham insonlar dardiga malham bo‘lishda davom etmoqda», deyiladi Milliy tibbiyot markazi matbuot xizmati xabarida.