Rossiyada Instagram’da reklama joylaganlar jarima to‘laydi

Bu haqda Davlat dumasining xavfsizlik qo‘mitasiga tayanib, «Izvestiya» nashri ma’lum qilmoqda.

Qonun loyihasiga ko‘ra, reklama tarqatish qoidalarini buzgan kompaniyalar 500 ming rublgacha, mansabdorlar 20 ming rublgacha, fuqarolar esa 2,5 ming rublgacha jarimaga tortiladi. Tegishli o‘zgartishlar «Reklama to‘g‘risida»gi qonunning 38-moddasiga kiritilishi rejalashtirilgan.

Hujjat Rossiya Iqtisodiy rivojlanish vazirligi, Raqamli rivojlanish vazirligi, Moliya vazirligi hamda Federal aksilpomonpoliya xizmati bilan kelishilgan.

Duma xavfsizlik qo‘mitasi raisi o‘rinbosari Anatoliy Vibornyyning ta’kidlashicha, taqiqqa qaramay, xorijiy platformalar reklama joylashni davom ettirmoqda. «Reklama orqali nafaqat blogerlar, balki Rossiyaga nisbatan dushmanona munosabatda bo‘lgan ijtimoiy tarmoqlar ham daromad olmoqda. Buni to‘xtatish kerak», — dedi u.

Ekspertlar ta’kidlashicha, bu cheklovlar Rossiyadagi ko‘plab blogerlar uchun asosiy daromad manbasini yo‘qotishiga olib keladi. Heads’made agentligi sherigi Yaroslav Meshalkinning fikricha, ba’zilar bozordan ketishga yoki daromad manbayini o‘zgartirishga majbur bo‘ladi. Uning so‘zlariga ko‘ra, kontent yaratuvchilarning bir qismi VK, Rutube va «Dzen» kabi milliy platformalarga o‘tishi mumkin.

Blogerlar va agantliklar assotsiatsiyasi vakillari ham yangi cheklovlar ortidan reklama shartnomalarini qayta ko‘rib chiqishga vaqt yetishmasligini aytgan.

PR Perfect agentligi asoschisi Kristina Petrova bunday taqiqni blogerlik faoliyati bilan shug‘ullanuvchi, lekin hali ham muxlislarini milliy platformalarga o‘tkaza olmaganlar uchun «so‘nggi zarba» deb atadi.

Qonun loyihasi ilk o‘qishda 2024 yil 23 iyulda qabul qilingan, ammo keyingi muhokamalar to‘xtab qolgan edi. Loyiha 25 mart kuni ikkinchi va uchinchi o‘qishda qabul qilinishi kutilmoqda.