Alphabet Wiz startapini 32 mlrd dollarga sotib oladi

Alphabet Inc. kiberxavfsizlik sohasida faoliyat yurituvchi Wiz startapini 32 milliard dollarga sotib olish bo‘yicha kelishuvga erishdi.

Kompaniyalarning qo‘shma press-relizida ta’kidlanishicha, bitim to‘liq pul mablag‘lari orqali yopiladi va u Alphabet tarixidagi eng yirik xaridga aylanadi. Bitim yakunlangach, Wiz Google Cloud’ning bulutli texnologiyalari bo‘linmasiga qo‘shiladi.

Kompaniya Wiz’ni xarid qilish bo‘yicha muzokaralarni 2024 yilda ham olib borgan, ammo u startap rahbariyati va investorlarning bitim antimonopoliya organlari qarshiligiga duch kelishi mumkinligi borasidagi xavotiri sabab bekor qilingandi.

2020 yilda tashkil etilgan Wiz bulutli servislar uchun kiberxavfsizlik sohasida yechimlar taqdim etish bilan shug‘ullanadi. Kompaniya o‘z xizmatlariga bo‘lgan talab yuqoriligi sabab dunyoda eng tez o‘sib borayotgan startap hisoblanadi. Wiz servislaridan AQShdagi eng yirik 100 ta kompaniyaning qariyb yarmi foydalanadi.

2024 yilda Wiz’ning daromadi 500 million dollarni tashkil etgan va kompaniya joriy yilda uni ikki barobarga oshirish maqsadini qo‘ygan.