Maktablar atrofida noma’lum shaxslar o‘quvchilarga xavfli shirinlik tarqatayotgani aytilmoqda

Tarmoqlarda tarqalgan videoda shunday shirinlik sabab bir bola vafot etgani aytilgan. Maktab vazirligi holat ichki ishlar organlari tomonidan o‘rganilayotganini, qandolat mahsuloti ekspertizaga berilganini, xulosasi kutilayotganini ma’lum qildi.

Foto: Videodan kadr

O‘zbekistondagi ayrim maktablar atrofida noma’lum shaxslar aylanib, bolalarga qulupnay ta’mli xavfli qand berib ketayotgani aytilgan videolar tarqaldi.

“14-maktabimizda bir bola shu qanddan yeb o‘libdi, shunga ehtiyot bo‘linglar. Sheroz, Yusufbek, birov qand bersa, yemanglar. Hotamsher ro‘zaligi uchun uyga ko‘tarib olib kelibdi…

Xudoga shukr, ro‘zaligi sabab yemagan edi, “aya, buni o‘rtog‘im berdi” deb qo‘limga olib kelgandi, qarasam, xuddi shu qanddan ekan. Ertaga ustozining oldiga olib chiqaman, ustoziga aytdim, “olib chiqing, hal qilamiz” dedi. Shunga ogoh bo‘linglar”, – deyiladi videodagi murojaatda.

Yana bir videoda ham maktab o‘quvchilarining qo‘liga xuddi shunday qand tushib qolgani, noma’lum kishilar avtomobilda kelib, bolalarga tutqazib ketishgani aytiladi.

“Bizning maktabga ham, bizning mahallaga ham kelib bo‘libdi. Mashinada indamay berib ketishibdi. Boshlanibdi mana bizning mahallada ham, bolalarga, o‘quvchilarga ehtiyot bo‘linglar”, – deydi ayol.

Kun.uz holat yuzasidan Maktabgacha va maktab ta’limi vazirligi bilan bog‘landi. Matbuot xizmatiga ko‘ra, ayni vaziyat IIO tomonidan o‘rganilmoqda. O‘quvchilar qo‘liga tushgan konfetlar ekspertizaga berilgan. Hali xulosa natijalari olingani yo‘q. Qo‘shimcha ma’lumot berilishi kutilyapti.

#shirinlik #maktab