Tojikiston, Qirg‘iziston va Qozog‘istonda joriy Ramazon oyi 29 kunda yakunlanishi kutilyapti. 30 mart Hayit bo‘lishi mumkin

Tojikistonda katta ehtimol bilan Ramazon oyi 29 kun davom etadi hamda 30 mart kuni Ramazon hayiti nishonlanadi. Bu haqda Tojikistonning Din, an’analar, bayramlar va marosimlarni tartibga solish qo‘mitasi xabar bergan.

«Tojikiston ulamolari kengashi 27 mart kuni yakuniy qaror chiqarish uchun majlis chaqiradi. Joriy yilda Rajab va Sha’bon oylari 30 kunga cho‘zilgani sababli yuqori ehtimol bilan Ramazon oyi 29 kun davom etadi. Mintaqadagi barcha davlatlar, shuningdek, Saudiya Arabistoni va boshqa musulmonlar davlatlar ham hozircha shu pozitsiyada», — deya hukumat rasmiysining so‘zlarini keltirmoqda AsiaPlus nashri.

Shuningdek, Qirg‘iziston musulmonlari diniy idorasi ham Ramazon oyi 29 martga qadar davom etishini, 30 martda Hayit ayyomi nishonlanishini e’lon qilgan.

Qozog‘istonda 27 fevral kuni Ramazon oyining boshlanishiga bag‘ishlab o‘tkazilgan tadbirda ushbu mamlakat diniy idorasi vakillari 30 mart kuni Hayit namozi o‘qilishini e’lon qilgan.

«...Qozog‘iston musulmonlari diniy boshqarmasining Shariat va fatvo qo‘mitasi Turkiy davlatlar tashkiloti muftiylar kengashi bilan birgalikda muqaddas oyning boshlanish sanasini belgiladi. Inshaalloh, 2025 yilda Ramazon oyi 1 martda boshlanib, 29 martda tugaydi. Qadr kechasi 26 martdan 27 martga o‘tar kechasida kiradi, Ramazon hayiti esa 30 mart kuni nishonlanadi», — degan Qozog‘iston musulmonlari idorasi vakili.

O‘zbekiston musulmonlari idorasining Kun.uz'ga ma’lum qilishicha, O‘zbekistonda bu masalada kuzatish va o‘rganish ishlari davom etmoqda.

«Mazkur masalada kuzatish, o‘rganish va tadqiq ishlari davom etmoqda. Yaqin kunlarda xulosalar taqdim etiladi, xabar qilamiz», deyiladi Musulmonlar idorasi taqdim qilgan ma’lumotda.

Eslatib o‘tamiz, joriy yil O‘zbekistonda muborak Ramazon oyi, Musulmonlar idorasi taqdim etgan axborotga ko‘ra 1 martdan boshlandi.

Joriy yil Ramazonda O‘zbekistondagi 2100 dan ortiq masjidda tarovih namozi, ularning 1740 dan ortig‘ida esa Qur’oni Karim to‘liq xatm qilinmoqda. Shuningdek, O‘zbekiston musulmonlari idorasi Fatvo markazi 2025 yil Ramazon oyi uchun zakot nisobi, fitr sadaqasi va fidya miqdorini e’lon qildi.