Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari tomonidan hududlarda korrupsion holatlarga chek qo‘yildi.
Ma’lum qilinishicha, Toshkent shahar hokimligining yuridik boshqarmasi yuriskonsulti chet el fuqarosiga tegishli bo‘lgan ko‘chmas mulk davlat ehtiyojlari uchun buzilganligi sababli kompensatsiya sifatida sud qarori bilan davlat tomonidan ajratilishi belgilab qo‘yilgan 8,8 mlrd so‘mni tezlashtirib olib berish evaziga 1979 yilda tug‘ilgan tanishi orqali mazkur pul mablag‘ining 10 foizini, ya’ni 70 ming AQSh dollari talab qilgan. Aks holda, sud qarori yuzasidan Toshkent shahar hokimligi nomidan kassatsiya shikoyati berib, ko‘chmas mulkni qayta baholash yo‘li bilan belgilangan kompensatsiya miqdorini kamaytirishi mumkinligini aytgan.
O‘tkazilgan tezkor tadbirda vositachi xorijiy fuqarodan 70 ming AQSh dollarini olgan vaqtida ashyoviy dalillar bilan ushlangan.
So‘rov suhbati davomida, u bir muddat avval yuriskonsultga o‘z hisobidan 50 ming dollar berib qo‘yganligini aytib, yana 15 ming dollarni yuriskonsultga olib borib berishini, qolgan 5 ming dollarni esa o‘zining vositachilik xizmati uchun olib qolishni rejalashtirganligini ma’lum qilgan. So‘ngra tezkor tadbir davom ettirilib, yuriskonsult 15 ming dollarni olgan vaqtida ushlangan.
Shuningdek, yuriskonsult muqaddam o‘zining vositachisidan olgan 50 ming dollardan 10 ming dollarini kompensatsiya mablag‘ining o‘tkazilish jarayonini tezlashtirib berishi uchun Toshkent shahar Iqtisodiyot va moliya bosh boshqarmasining bosh mutaxassisiga berganligi ma’lum bo‘lgan.
Yuriskonsult ko‘rsatmasi asosida bosh mutaxasiss protsessual tartibda ushlangan hamda yuriskonsult 40 ming dollarni, bosh mutaxassis esa 10 ming dollarni ixtiyoriy ravishda taqdim qilgan.
“Hududgaz Surxondaryo” gaz ta’minoti filialining Termiz shahar bo‘limi gaz ta’minoti obektlarini texnik tiklash va ishlatish xizmati boshlig‘i Koson tumanida yashovchi fuqaro yuk avtomashinasini boshqarib ketayotib, avtotransport vositasining tom qismi bilan tabiiy gaz quvuriga shikast yetkazgani holati yuzasidan tuzilgan dalolatnomani yo‘q qilish hamda 11 mln so‘m miqdorida jarimaga tortmaslik evaziga undan 400 dollar va 500 ming so‘m talab qilgan. U 3 mln 900 ming so‘m va 100 dollar olgan vaqtida ashyoviy dalillar bilan ushlangan. Tergovga qadar tekshiruv davomida, u avvalroq 500 ming so‘m olganligi ham ma’lum bo‘lgan.
Yana bir holatda Kadastr agentligining Jizzax viloyati Zomin tumani bo‘limi yetakchi inspektori 1997 yilda tug‘ilgan fuqaro o‘zboshimchalik bilan egallab olgan yer uchastkasida qurilish ishlarini amalga oshirganligi holati yuzasidan qo‘llangan 75 mln so‘m miqdoridagi jarimani tanishlari orqali kamaytirib, noqonuniy qurilgan turar joy binosining hujjatlarini rasmiylashtirib berish evaziga 400 dollar olgan vaqtida ushlangan.
