France24 telekanali 4 aprel kuni Kriviy Rihda Rossiya qo‘shinlari raketa zarbasiga duchor bo‘lgan restoranga o‘rnatilgan kuzatuv kameralaridan olingan kadrlarni namoyish etdi.
Rossiya Mudofaa vazirligi raketa «bo‘linmalar komandirlari va g‘arblik instruktorlar yig‘ilishi» bo‘lib o‘tayotgan restoranga otilganini ma’lum qilgandi.
France24 tomonidan e’lon qilingan videoda esa harbiylar ko‘rinmagan. Telekanal muxbiri zarba vaqtida restoranda bo‘lgan va jarohatlar bilan shifoxonaga yotqizilgan ikki ayol bilan suhbatlashdi. Ular «go‘zallik forumi»da ishtirok etganliklarini tasdiqlagan.
Avvalroq «Sistema» loyihasi Rossiya raketasi kelib tushgan hududda RoseMarine nomli (avval «Magellan» deb atalgan) birgina restoran joylashgani, bu yerda o‘sha kuni go‘zallik sanoati xodimlari forumi o‘tkazilganini aniqlagandi.
Tadbir tashkilotchisi bo‘lgan «Kriviy Rih biznes ittifoqi» bu haqda 24 fevral kuni o‘z telegram-kanalida va boshqa mahalliy kanallarda anons bergan. Postlar tahrirlanmagan va oldindan e’lon qilingan.
Uyushma vakili nashrga 4 aprel kuni mazkur restoranda chindan ham go‘zallik forumi bo‘lib o‘tganini tasdiqlagan. Uning so‘zlariga ko‘ra, tadbir taxminan to‘rt soat davom etgan va ishtirokchilarning asosiy qismi 18:30 atrofida tarqalgan. Rossiya mudofaa vazirligi ma’lumotida restoranga zarba soat 18:49 da yo‘llangani aytilgan. «Sistema» suhbatdoshining so‘zlariga ko‘ra, forum bilan bir vaqtda restoranda tug‘ilgan kun bo‘lib o‘tgan, unda yoshlar va bolalar ko‘p edi.
Kriviy Rih bo‘ylab 4 aprel kuni berilgan zarba oqibatida 20 kishi halok bo‘lgan, shundan to‘qqiz nafari bolalar. O‘nlab kishilar jarohatlangan va shifoxonaga yotqizilgan.
