Xitoyda yuzlab robotlar uchta tarixiy binoni ko‘chirdi

Xitoyning Shanxay shahrida tarixiy arxitektura majmuasi robotlar yordamida boshqa joyga vaqtincha ko‘chirildi. Bu haqda Xitoyning «Jenmin Jibao» nashriga tayanib, Hi-tech mail xabar berdi.

G‘ayrioddiy loyiha XIX asr ikkinchi yarmida shikumen uslubida qurilgan binolarni ko‘chirish bo‘yicha mamlakat tarixidagi eng yirik tadbir bo‘ldi. Ushbu binolar ikki yoki uch qavatli bo‘lib, karkasi yog‘ochdan yasalgan, devorlari esa g‘isht bilan qoplangan.

Rasmiylar 1920-1930 yillarda qurilgan «Huayanli» majmuasini ko‘chirishga majbur bo‘ldi. Bu taxminan 7500 tonna og‘irlikdagi uchta binodan iborat blok bo‘lib, umumiy maydoni 4030 kvadrat metrdan oshadi. Shanxayda yerosti majmuasini qurish uchun binolarni vaqtincha ko‘chirishga, keyinchalik yana joyiga qaytarishga qaror qilishdi.

Mutaxassislar binolarni ko‘chirishda 432 robotdan foydalandi. Turar-joy majmuasi obektlarni kuniga taxminan 10 metr tezlikda harakatga keltiradigan ko‘targichli qurilmalarga joylashtirildi. Ishlar 19 mayda boshlangan bo‘lib, 7 iyun kuni to‘liq yakunlanadi – shu kuni binolar o‘z joyiga qaytadi. Mutaxassislarning qayd etishicha, ular robotlarning holati va butun jarayonni real vaqt rejimida kuzatib borishgan. Ko‘chirish paytida binolar buzilmasligi uchun yuklama bir tekis qilingan.

Tarixiy kvartal ostida dam olish va ko‘ngilochar maskani paydo bo‘lishi taxmin qilinmoqda. U yerda premium mehmonxonalar, san’at markazi va konsert maydoni quriladi. Bundan tashqari, yer ostida metro liniyalari o‘rtasida harakatlanish uchun o‘tish joyi paydo bo‘ladi. Yerosti makonining umumiy maydoni 53 ming kvadrat metrni tashkil qiladi.