Farg‘onada tuman MIB boshlig‘i pora bilan ushlandi

U sudning ijro varaqasi bo‘yicha ijro harakatlarini yakunlab berish evaziga 2 ming AQSh dollari talab qilgan.

Foto: DXX

Farg‘ona viloyatidagi tumanlardan birining Majburiy ijro byurosi boshlig‘i pora bilan qo‘lga olindi, deb xabar berdi DXX.

Qayd qilinishicha, u o‘z xizmat vakolatidan foydalangan holda, bo‘ysunuvidagi davlat ijrochisi ish yurituvida bo‘lgan fuqarolik ishlari bo‘yicha sudning ijro varaqasi bo‘yicha javobgarlarni ushbu tumandagi xonadondan majburiy tartibda ko‘chirish yuzasidan ijro harakatlarini yakunlab berish evaziga 2 ming AQSh dollari talab qilgan.

3 iyun kuni u talab qilingan pul mablag‘idan 1200 AQSh dollarini pora sifatida olgan. Davlat xavfsizlik xizmati va Bosh prokuratura huzuridagi Departament hamkorligida o‘tkazilgan tezkor tadbirda, u qolgan 800 AQSh dollarini olgan vaqtida ashyoviy dalillar bilan ushlangan.

Holat yuzasidan MIB mansabdor xodimiga nisbatan Jinoyat kodeksining 210-moddasi 2-qismi “v” bandi bilan jinoyat ishi qo‘zg‘atilib, qamoq ehtiyot chorasi qo‘llandi.