Qirg‘izistonda aholi jon boshiga daromadlar oxirgi 3 yilda 85 foizga oshib, 2 500 dollarga yetgan. Iqtisodchi Mirkomil Xolboyevga ko‘ra, bu o‘sish tendensiyasi saqlanib qoladigan bo‘lsa, qo‘shni respublika 2027 yilga borib jon boshiga daromadlar bo‘yicha O‘zbekistondan o‘tib ketadi. 2030 yilga borib, o‘rtacha qirg‘izistonlik o‘rtacha o‘zbekistonlikdan 1,5 baravarga boyroq bo‘lishi mumkin.
2022-2024 yillar oralig‘ida Qirg‘izistonda aholi jon boshiga daromad qariyb ikki barobarga oshdi. – Bu Markaziy Osiyodagi eng yuqori o‘sish ko‘rsatkichi. Bu haqda Xalqaro valuta jamg‘armasi hisobotida qayd etilgan.
Hisobotda keltirilishicha, Qirg‘izistonda so‘nggi uch yilda iqtisodiy o‘sish har yili 9 foizdan bo‘lgan. Jon boshiga daromadlar esa 85 foizga o‘sib, 2 500 dollarga yetgan. Taqqoslash uchun, bu davrda jon boshiga daromad Tojikistonda 49 foizga, Qozog‘istonda 42 foizga, O‘zbekistonda 37 foizga oshgan.
XVJ ma’lumotlariga ko‘ra, Qirg‘izistonda joriy yilning birinchi choragida o‘sish yanada tezlashib, 13,1 foizga yetgan. Yil yakunida umumiy o‘sish 6,8 foizni tashkil etishi, o‘rta muddatli istiqbolda esa bu ko‘rsatkich 5,25 foizgacha sekinlashishi prognoz qilinyapti.
O‘zbekistonlik iqtisodchi Mirkomil Xolboyevning e’tibor qaratishicha, agar Qirg‘izistonda iqtisodiy o‘sish shunday sur’atlarda davom etsa, mamlakat 2027 yilga borib aholi jon boshiga daromadlar bo‘yicha O‘zbekistondan o‘tib ketadi.
“Agar so‘nggi uch yildagi (dollardagi) o‘rtacha o‘sish davom etsa, unda Qirg‘iziston 2026 yilda jon boshiga daromad bo‘yicha mamlakatimizga deyarli yetib oladi, 2027 yildan esa o‘rtacha qirg‘izistonlik o‘rtacha o‘zbekistonlikdan boyroq bo‘ladi. 2030 yilga borib Qirg‘izistonda jon boshiga daromad O‘zbekistonga nisbatan 1,5 barobarga yuqoriroq bo‘lishi mumkin”, deya yozdi u.
Qattiqqo‘l hokimiyat va urush effekti
O‘zbekistonlik boshqa bir taniqli iqtisodchi Otabek Bakirovga ko‘ra
