Polsha Germaniya bilan chegarada chegara nazoratini joriy qildi

Polsha 7 iyul, dushanba kuni Germaniya bilan chegarada statsionar chegara nazoratini joriy qildi. Tasodifiy tekshiruvlar 52 nazorat-o‘tkazish punktida yarim tunda boshlandi va kamida 5 avgustga qadar davom etadi. Xuddi shunday choralar Litva bilan chegarada ham ko‘riladi.

Chegarani kesib o‘tayotganlarning pasporti va shaxsni tasdiqlovchi hujjatlari tekshiriladi. Polsha chegarachilari avtobuslar, mikroavtobuslar va yo‘lovchilar soni ko‘p bo‘lgan yengil avtomobillarga, oynalari qoraytirilgan avtomobillarga alohida e’tibor qaratadi. Polsha bosh vaziri Donald Tuskning aytishicha, bu chora-tadbirlar noqonuniy muhojirlarning «nazoratsiz oqimini cheklashga» yordam berishga qaratilgan.

Tusk Varshava Berlinning harakatlariga javoban bunday qarorga kelganini bir necha bor ta’kidlab kelgan. May oyi boshida yangi federal ichki ishlar vaziri Aleksandr Dobrindt chegara nazoratini kuchaytirish va Polsha chegarasida boshpana so‘rovchilar arizasini rad etishni buyurdi. Undan avvalgi vazir Nensi Fezer 2023 yil oktyabr oyida Polsha bilan chegarada statsionar nazoratni joriy qilgan edi.

Germaniya biznesi uyushmalari Polsha chegaralarini nazorat qilishning yangi choralaridan xavotir bildirdi. Germaniya Savdo-sanoat palatasi (DIHK) bosh direktori Helena Melnikov Handelsblatt'ga bu Germaniyada ishlayotgan polshalik fuqarolarning ish joyiga borishi va qaytishini qiyinlashtirishi, chegara hududlaridagi turli kompaniyalardan, fabrikalardan supermarketlarga va umumiy ovqatlanish korxonalariga xodimlarning ishdan ketishiga olib kelishini aytdi. Melnikov bu muammoni hal qilish uchun «qo‘shni davlatlar o‘rtasidagi pragmatik kelishuvlar»ga chaqirdi.