Hukumat qarori bilan «Sea Breeze Uzbekistan» loyihasini amalga oshirish chora-tadbirlari tasdiqlandi

Vazirlar Mahkamasining «Sea Breeze Uzbekistan» umummavsumiy kurort majmuasini barpo etish bo‘yicha yirik investitsiya loyihasini amalga oshirish chora tadbirlari to‘g‘risidagi qarori e’lon qilindi.

Qarorga ko‘ra, kurort hududida atrof-muhit holati, jumladan, suv sifati ustidan davlat organlari tomonidan doimiy nazorat o‘rnatiladi.

Yashil maydonlar ekologik va estetik qiymati darajasiga ko‘ra tasniflanadi va eng muhim namunalarga nisbatan kesish emas, balki ko‘chirib o‘tkazish choralari ko‘riladi.

Bosh prokuratura kurort hududida barcha shaharsozlik va ekologik me’yorlarga rioya etilishini alohida nazoratga oladi.

Ozarboyjonning «Agalarov Development» MChJ hamda uning qo‘shma korxonasi tomonidan Toshkent viloyati Bo‘stonliq tumanidagi 577 gektar maydonda «Sea Breeze Uzbekistan» majmuasini qurish bo‘yicha Respublika ishchi guruhi tuzildi.

Ushbu majmuaning qiymati 5 mlrd AQSh dollarini tashkil etadi. Tanlangan loyiha hududni rivojlantirish, xizmat ko‘rsatish sifatini oshirish va mahalliy aholi uchun yangi ish o‘rinlari yaratishga xizmat qiladigan zamonaviy turizm infratuzilmasini yaratishni nazarda tutadi.

«Sea Breeze Uzbekistan» tasdiqlangan loyihani amalga oshirish doirasida bir qator majburiyatlarni o‘z zimmasiga oladi. Kurort majmuasini qurishga kirishishdan oldin barcha loyiha yechimlari vakolatli davlat organlari bilan kelishilishi lozim.

Bundan tashqari, kurort hududida iste’molchilarga ko‘rsatiladigan kommunal xizmatlar tariflari Vazirlar Mahkamasi bilan kelishilgan holda belgilanadi. Kompaniya o‘z faoliyatida turizm infratuzilmasini rivojlantirish, barqaror qurilishning ekologik talablari va standartlariga rioya qilish bo‘yicha ilg‘or xorijiy tajribaga tayanadi.

«Sea Breeze Uzbekistan» loyihasini amalga oshirishda xususiy mulk bo‘lgan obektlar uchun amaldagi qonunchilikka muvofiq kompensatsiya to‘lanadi.

Qarorda loyihaning amalga oshirilishi davlat organlari tomonidan nazoratga olinishi belgilangan. Bosh prokuratura kurort hududida barcha shaharsozlik va ekologik me’yorlarga rioya etilishini alohida nazoratga oladi.

Loyihani ekologik talablarga rioya qilgan holda amalga oshirish, shu jumladan, loyihani amalga oshirish davrida va loyiha ishga tushgandan keyin chiqindi hamda oqova suvlarining Chorvoq suv ombori va Chirchiq daryosiga tashlanishiga yo‘l qo‘ymaslik, oqova suvlarni Chirchiq shahri oqova suvlarni tozalash inshootiga yo‘naltirish choralarini ko‘rish «Sea Breeze Uzbekistan» MChJning asosiy majburiyatlaridan biri etib belgilandi.

Ekologik talablarga rioya etilmasligi loyihaning to‘xtatilishiga va yerga bo‘lgan ijara huquqining bekor qilinishiga asos bo‘ladi.