Drezdenda pichoq bilan qilingan hujum: 21 yoshli suriyalik hibsga olindi

Drezdendagi tramvayda AQSh fuqarosi pichoqlangan hujum holatini o‘rganib, tergov voqeadan so‘ng darhol qo‘lga olingan, ammo ko‘p o‘tmay qo‘yib yuborilgan gumonlanuvchining hujumga aloqadorligi haqidagi xulosaga keldi. Drezden prokuraturasi va politsiyasining qo‘shma press-relizida gumonlanuvchi 21 yoshli suriyalik ekani, u 26 avgust, seshanba kuni ertalab prokuratura buyrug‘i bilan tergov izolyatoriga joylashtirilgani ko‘rsatilgan.

Mahkamalarning xabar berishicha, qo‘lga olingan 20 yoshli shaxs amerikalikka «xavfli narsa» bilan tan jarohati yetkazgan, degan jiddiy shubha bor. Tergov tafsilotlari tergov manfaati yo‘lida oshkor etilmayapti.

Politsiya avval xabar berganidek, hodisa 24 avgust, yakshanbaga o‘tar kechasi tramvayda, u to‘xtash joyida turgan vaqtda sodir bo‘lgan. Ikki erkak yo‘lovchi ayolni bezovta qilayotganini ko‘rgan AQSh fuqarosi (dastlab 21 yoshda ekani aytilgan) vaziyatga aralashib, janjal paytida yuzidan pichoq bilan jarohat olgan. Hujumchilar qochib ketgan. Politsiya 21 yoshli Suriya fuqarosini voqea joyi yaqinida qo‘lga oldi, biroq prokuratura uni hibsga olish uchun yetarli asos topmagani uchun u tez orada qo‘yib yuborildi.

Politsiya ma’lumotlariga ko‘ra, jabrlanuvchining hayoti xavf ostida emas. Internetda unga yordam berish uchun mablag‘ yig‘ish boshlandi, deya xabar beradi dpa.