O‘zbekistonda Yevroosiyo bankining litsenziyasi bekor qilindi

O‘zbekiston Markaziy banki boshqaruvining 27 avgust kungi qarori bilan, “Yevroosiyo banki” AJdan bank faoliyatini amalga oshirish huquqini beruvchi litsenziya chaqirib olindi.

Regulyator xabariga ko‘ra, bank tomonidan ustav kapitali miqdori qonunchilikda belgilangan eng kam talablarga muvofiqlashtirilmagan. Shuningdek, banklar va bank faoliyati to‘g‘risidagi qonunchilikda belgilangan boshqa talablar bajarilmagan.

Markaziy bank, shuningdek, Yevroosiyo bankini majburiy tugatish va tugatish komissiyasini tayinlash to‘g‘risida qaror qabul qildi.

Ma’lumot uchun, tijorat banklarining ustav kapitali 2025 yil 1 yanvardan boshlab 500 mlrd so‘mdan kam bo‘lmasligi kerak. 2025 yil 1 avgust holatiga, Yevroosiyo bankining kapitali 104 mlrd so‘mni tashkil etadi.

Yevroosiyo banki – Qozog‘istondagi shu nomli bankning O‘zbekistondagi sho‘basi bo‘lib, 2024 yil yanvar oyida litsenziya olgandi. 2025 yil 1 avgust holatiga, bankning depozit va kredit portfeli nolga teng. Kredit tashkiloti 2025 yilning birinchi yarmini 51,6 mlrd so‘m zarar bilan yakunlagan.

Qozog‘istondagi Yevroosiyo bankiga 1994 yilda asos solingan, bosh ofisi Olmaota shahrida joylashgan. Forbes ma’lumotiga ko‘ra, kompaniyaning yakuniy benefitsiarlari Ibragimovlar oilasi, Aleksandr Mashkevichning vorislari va Fattoh Shodiyev hisoblanadi.