O‘zbekiston chegarasida ikki nafar qirg‘izistonlik halok bo‘ldi

Qirg‘iziston chegara xizmati O‘zbekiston bilan chegarada ikki qirg‘izistonlik halok bo‘lganini ma’lum qildi. Bu haqda 24.kg xabar berdi.

Qayd qilinishicha, 25 avgust kuni militsiyaga Jalolobod viloyatining Chotqol tumanidagi Ayg‘ir-Jal qishlog‘ida yashovchi ikki kishi bedarak yo‘qolgani haqida xabar berilgan. 28 avgust kuni ishchi uchrashuv doirasida O‘zbekiston tomoni chegara vakillari 15 avgust kuni O‘zbekiston Respublikasi hududida, Qirg‘iziston, O‘zbekiston va Qozog‘iston chegaralari tutashgan hududda O‘zbekiston chegara naryadi ikki nafar noma’lum fuqaroni aniqlaganini ma’lum qilgan. O‘zbekiston tomonining ma’lumotlariga ko‘ra, ular chegarachilarga bo‘ysunmagan va qo‘lga olishga urinish chog‘ida chegarachilar qurol ishlatgan. Oqibatda har ikki fuqaro o‘q jarohati olib, halok bo‘lgan.

Ta’kidlanishicha, 31 avgust kuni bedarak yo‘qolgan qirg‘izistonliklarning qarindoshlari O‘zbekistonga jo‘nab ketdi va halok bo‘lganlarning shaxsini tasdiqladi. 1 sentabr kuni «Baymak» nazorat-o‘tkazish punkti orqali Qirg‘iziston Respublikasi ikki fuqarosining jasadi Qirg‘iziston tomoniga topshirildi va ekspertiza uchun Kerben o‘likxonasiga yetkazildi.

Bundan tashqari, Qirg‘iziston va O‘zbekiston chegara idoralari rahbarlari 2 sentabrdan boshlab voqea joyini birgalikda o‘rganishga kelishib oldi. O‘zbekiston tomoni halok bo‘lgan fuqarolarning topilgan mol-mulki - uchta ot va chodirni Qirg‘izistonga topshirishga tayyorligini bildirdi.

Ta’kidlanishicha, qirg‘izistonliklarning o‘limi tafsilotlari bo‘yicha har tomonlama tekshiruv o‘tkazilmoqda, uning natijalari jamoatchilikka yetkaziladi.