BYD Leopard Titanium 7 sotuvga chiqmoqda. Uning narxi 32 ming dollardan boshlanadi

Hibrid rejimda 1300 kilometrdan ortiqroq masofa bosib o‘ta olishi aytilayotgan yangi yo‘ltanlamasning sotuvlariga 9 sentabrdan start beriladi.

Foto: BYD

BYD Leopard Titanium 7 modelini 4 xil komplektatsiyada xaridorlarga boshlang‘ich 230 ming yuan (32 ming dollar atrofida) narx bilan taklif qiladi.

Yo‘ltanlamasning o‘lchamlari shunday: uzunligi 4999 mm, eni 1995 mm, balandligi esa 1865 mm. G‘ildiraklar bazasi 2920 mmga teng. Mashina besh kishiga mo‘ljallangan.

Titanium 7 BYD’ning eng so‘nggi aqlli texnologiyalari bilan jihozlangan. Shuningdek, avtomobilning top komplektatsiyasi 25 km/soatgacha tezlikda uchish va qo‘nishni, to‘siqlardan qochishni hamda aerofotosuratga olishni ta’minlovchi Lingyuan dronlarni boshqarish texnologiyasini qo‘llab-quvvatlaydi.

To‘rtala g‘ildiraklari ham “tortadigan” versiya 35,6 kWh sig‘imli batareya bilan jihozlangan. Bu bilan mashina tokning o‘zida CLTC sikli bo‘yicha 180 km masofa boib o‘tishi mumkin. Faqat orqa g‘ildiraklari tortuvchi versiya esa 26,6 kWh sig‘imli batareyaga ega, bu unga tokning o‘zida 135 km yo‘l bosish imkonini beradi. Hibrid rejimda esa to‘la benzin baki bilan 1300 kmdan ziyodroq masofa bosib o‘tish mumkinligi va’da qilinmoqda.