O‘tgan yili 900 mingga yaqin ish o‘rni hisobotlarga qo‘shib yozilgan - Bosh prokuror

2024 yilda 900 minga yaqin ish o‘rinlari hisobotlarga qo‘shib yozilgan, yolg‘on ma’lumot berilgan. Aslida buncha ish o‘rni yaratilmagan. Bu haqda 5 sentabr kuni o‘tkazilgan Senat majlisida bosh prokuror Nig‘matilla Yo‘ldoshev ma’lumot berdi.

Uning aytishicha, o‘tgan yili mamlakatda kambag‘allikni qisqartirish bo‘yicha bajarilgan ishlarda qator kamchiliklar aniqlangan.

«Ayrim mutasaddilar mazkur masalaga jiddiy e’tibor qaratmayapti. Nazorat tadbirlarimizda haqiqatda yaratilmagan 900 minga yaqin ish o‘rni hisobotlarga qo‘shib yozilgani, 78 ta holatda 12 milliard so‘mlik ish haqi talon-toroj qilingani aniqlanib, qonuniy choralar ko‘rildi. Fuqarolarga to‘lanmay qolgan 11 milliard so‘mlik ish haqi undirib berildi», dedi bosh prokuror.

Nig‘matilla Yo‘ldoshev kimlar bu ishga qo‘l urgani va ularga qanday chora ko‘rilganiga aniqlik kiritmadi.

Shuningdek, o‘tgan yili prokurorlar 29 mingdan ziyod tadbirkor va investorlarga turli muammolarini hal qilishda yordam bergani, 7 mingdan ortiq yangi korxona tashkil etilgani, 8 mingtasining faoliyati tiklangani ma’lum qilindi.

«Tadbirkorlar faoliyatiga to‘sqinlik qilish bilan bog‘liq 22 mingta holat aniqlanib, keskin choralar ko‘rildi», dedi Bosh prokuratura rahbari.