Toshkentda yana bir avtosalon o‘nlab mijozlarini chuv tushirgani ma’lum bo‘ldi

Toshkent shahridagi “Premier Motors Auto” MChJ vakillariga nisbatan jinoyat ish qo‘zg‘atildi. 2022 yil 5 sentabrda davlat ro‘yxatidan o‘tkazilgan MChJda menejer sifatida ishlagan D.I. juda ko‘p miqdorda firibgarlik jinoyatini sodir qilganlikda gumonlanmoqda.

Kun.uz tanishgan ayblov xulosasida keltirilishicha, D.I. MChJ ta’sischilaridan biri Sh.R. va jamiyat ishchilari bilan bir guruh bo‘lib, 20 ga yaqin holatda mashina olib berish yoki mashinasini sotib olish va’dasi bilan fuqarolarni aldagan. To‘langan pul mablag‘larini esa shaxsiy ehtiyojlariga sarflab yuborgan.

Jumladan, u Sergeli tumani Qumariq ko‘chasida joylashgan “Premier Motors Auto” avtosalonida fuqaro V.A.ning ishonchiga kirib, uning Cobalt mashinasini 10 200 dollarga sotib olishga, pulini qisqa muddatda berishga kelishgan. So‘ngra qo‘lga kiritilgan mashinani boshqa shaxsga sotib, pulini o‘z ehtiyojlariga sarflagan.

D.I. shu kabi fuqaro A.B.ning 375 mln so‘mga savdolashilgan Malibu, I.M.ning 72 500 dollarga savdolashilgan Lixiang L9, A.M.ning 47 ming dollarga savdolashilgan BMW I3, U.X.ning 13 ming dollarga savdolashilgan Cobalt, I.Yu.ning 12 ming dollarga savdolashilgan Gentra mashinasini boshqa shaxslarga sotib yuborib, pulini shaxsiy ehtiyojlariga sarflab yuborgan.

Shuningdek, D.I. o‘zini MChJ rahbari sifatida tanishtirib, fuqaro S.M.ga Equinox olib berishni va’da qilgan va 44 mln so‘m pulini olib, u bilan shartnoma imzolagan. Sudga oid xatshunoslik ekspertizasi mazkur shartnomadagi imzo MChJ rahbari Sh.R.ga tegishli emasligi, balki D.I. tomonidan bajarilgani haqida xulosa bergan. D.I. va’dasini bajarmagan, 44 mln so‘m pulni esa shaxsiy ehtiyojlariga sarflagan.

Shu kabi F.X.ga Onix olib beraman deb 88 mln so‘m, F.Y.ga BMW I3 olib beraman deb 400 mln so‘m, G.X.ga Lixiang L9 olib beraman deb 68 500 dollar, Sh.A.ga Equinox olib beraman deb 231 mln so‘m, B.Q.ga Traverse olib beraman deb 28 300 dollar, S.S.ga Lixiang L9 olib beraman deb 67 ming dollar, T.P.ga Equinox olib beraman deb 369 mln so‘m, R.Xga Equinox olib beraman deb 235 mln so‘m, N.N.ga Equinox olib beraman deb 229 mln so‘m, J.S.ga 3 dona Malibu-2 mashinasini olib beraman deb 669 mln so‘m, M.M.ga Equinox olib beraman deb 447 mln so‘m, M.D.ga Malibu-2 mashinasini olib beraman deb 219 mln so‘m, S.T.ga Lixiang L9 olib beraman deb 390 mln so‘m pul mablag‘larini olgan. Biroq va’dasini bajarmagan, pullarni esa o‘z ehtiyojiga ishlatib yuborgan.

32 yoshli D.I. Jinoyat kodeksining 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 2-qismi “a, b” bandlari, 228-moddasi 3-qismi va 168-moddasi (Firibgarlik) 4-qismi “a” bandi bilan ayblanmoqda.

Jinoyat ishining “Premier Motors Auto” MChJ ta’sischilaridan biri Sh.R. va jamiyatning bir nechta ishchilarga oid qismi ajratilib, alohida ish yurituviga olingan.

Kun.uz oldinroq odamlarga foizsiz bo‘lib to‘lash sharti bilan qimmatbaho elektromobillarni va’da qilgan “Global avto kredit” MChJ faoliyatini shubha ostiga olgandi. Undan avval esa «Pr premier-avto» MChJ rahbariga sud hukmi o‘qilgandi.