“Биз Хитойдан “оптом” оламиз” – Тошкентда яна бир шубҳали “автосалон” пайдо бўлди

Шу йил февралида давлат рўйхатидан ўтган, 30 майдан “сотув” рекламаларини бошлаган “Global avto kredit” МЧЖ одамларга фоизсиз бўлиб тўлаш шарти билан қимматбаҳо электромобилларни ваъда қилмоқда. GM машиналари эса йиллик 10 фоизли устама билан 5 йилгача насия савдога берилиши айтилган. Фирма ижтимоий тармоқлардаги каналига бир нечта машина “мижозларга етказиб берилгани” ҳақида видеолавҳа жойлаштирган. Kun.uz бу машиналар бошқа автосалонлардан харид қилинганини аниқлади.

{Yii::t(}

Ўтказиб юбориш 6s

Ўтказиб юбориш

Хўрак

Жозибали реклама, осон шартлар ва арзон нарх – Ўзбекистонда машина сотиб олмоқчи бўлаётганларни чув тушириш учун мана шу ваъдалар етарли, қанчалик шубҳали бўлмасин одамлар ўз оёқлари билан сиртмоқ ичига кириб бораверишади. Буни қарийб 10 йилдан буён давом этиб келаётган, бири қамалса бошқаси пайдо бўлаётган “Авто 60 ой”дан то “Halol avtolizing”гача бўлган қатор фирмалар мисолида кўриш мумкин.

Афсуски, бу кетма-кетлик занжири ҳамон узилгани йўқ: “йиғаман-у, қочаман” қабилидаги шубҳали автосалонлар пайдо бўлишда ва одамларни чув туширишда давом этмоқда. Шундай шубҳали фирмалардан бири “Global avto kredit” МЧЖ ҳисобланади. Ушбу фирма “хўрак” сифатида одамларга қимматбаҳо электромобилларни фоизсиз бўлиб тўлаш шарти билан олиб беришни ваъда қилмоқда.

“Хитойда одамимиз бор”

“Global avto kredit” МЧЖ 2025 йил 10 феврал куни давлат рўйхатидан ўтказилган. Фаолият тури – автомобиллар ва енгил моторли транспорт воситаларининг чакана савдоси.

Устав капитали 500 млн сўм сифатида кўрсатилган МЧЖ таъсисчиси ва раҳбари Бахтимуродов Бекзод Бахтимурод ўғли ҳисобланади.

МЧЖ Telegram’да канал очиб, жорий йил 30 май кунидан “сотув” рекламаларини эълон қила бошлаган. Хусусан, биринчи рекламада Cobalt машиналарини “салон нархида” ва “ҳалол насия” асосида харид қилиш мумкинлиги айтилади. Насия савдо шарти сифатида 1 йилдан 5 йилгача йиллик фоизли устама таклиф қилинган. Қолаверса, машина мижознинг ўз номига расмийлаштирилиши айтилган.

“Global avto” менежерлари қимматбаҳо электромобилларни фоизсиз бўлиб тўлаш шарти билан олиб беришни ҳам билдиришяпти. Улар томонидан ҳатто расмий дистрибютори банк орқали йиллик 29 фоизли кредитда таклиф этаётган Kia Sonet’ни ҳам йиллик 10 фоизли устамада 5 йилгача бўлган муддатда бўлиб тўлашга олиб бериш ваъда қилинмоқда.

Kun.uz вакили мижоз сифатида фирма офисига бориб, менежер билан суҳбатлашди. Уларнинг суҳбати қуйидагича кечди:

Kun.uz вакили: “Фоизсиз берасизларми?”

Фирма менежери: “Ҳа”.

Kun.uz вакили: “Унда сизлар қаердан фойда кўрасизлар?”

Фирма менежери: “Таннархидан”.

Kun.uz вакили: “Таннархини ҳам ўзи арзон қилиб беряпсизлар-ку. Ўзи мен Leapmotor C11’ни сўрасам, 24 минг доллар дейишганди”.

Фирма менежери: “24 мингга нақдга бор. Бизда 23 минг, минг доллар арзон. Биз “заказ” билан объёмда оламиз-ку машинани, шунга “оптом” сифатида арзон тушади”.

Kun.uz вакили: “Malibu’га 60 фоиз бошланғич тўловини тўласам, қолганини 1 йилга фоизсиз тўлов қилиб бера оласизларми?”

Фирма менежери: “Ҳа, қилиб берамиз агар 60 фоизи тўласангиз”.

Kun.uz вакили: “Қанча пайтда тўлаш керак бўлади бошланғич тўловни?”

Фирма менежери: “Шартнома олгандан сўнг 1 кунда. Чунки бизда шартнома алмашади-да. C11 бўлсинми?”

Kun.uz вакили: “Ҳа”

Фирма менежери: “Бошланғич тўлови 183 млн 960 минг сўм, ойлик тўлови 9 млн 733 минг сўм бўлади 12 ойга. 3 фоизлик “камиссионний” бор, ҳамма нарсаси, суғуртаси ҳам ичида, харажат қилмайсиз”.

Kun.uz вакили: “Банкларда ҳам 20 фоиздан юқори, сизлар GM машиналарига 10 фоиз деяпсизлар, қаердан фойда қиласизлар?”

Фирма менежери: “Бу фирманинг ўзининг пули. Тўловларнинг барчаси банк орқали бўлади. Бизда арзонлигининг сабаби, биз тўғри Хитойдаги заводдан олиб келамиз, ўртада иккинчи “қўл” йўқ. Хитойда етказиб берувчимиз бор, биз унга айтамиз, у олиб жўнатади. Объёмда буюртма қилсак яхшигина чегирмада келади. GM билан эса очилганда шартнома қилиб қўямиз ва йил давомида олаверамиз. Масалан, Gobalt машинасини 147 млн сўмга оламиз. 3 млн сўм хизмат нархи қўшилади ва йиллик 10 фоиз устама билан берамиз. Ҳар ҳафта машина чиқарамиз ва сотамиз бизлар. Мижоз чақириш учун 10 фоиз қилганмиз бошида, тахминан сентябр ойларидан 15 фоизга кўтарилади”.

Шунингдек, фирма менежери агар 50 фоиз бошланғич тўлов амалга оширилса, Cobalt машинасини ҳам 1 йил муддатга бўлиб тўлаш шарти билан фоизсиз беришини маълум қилган. У бугунга қадар машиналар энг тез 53 кунда, энг узоғи эса 68 кунда келтириб берилганини айтган. Ва бунга божхонада расмийлаштирув билан боғлиқ қийинчиликлар сабаб бўлганини келтирган. Бундан ташқари, у машинани Пискентдан ўзлари ўтказиб беришини ҳам қўшимча қилган.

Kun.uz вакили фирма менежеридан суҳбатлашиб кўриш учун бугунга қадар “Global avto”дан машина олган бирор мижознинг телефон рақамини сўради. Бироқ менежер машина олган мижозлар рақамини бера олмаслигини, тўлов аниқ бўлсагина бирортаси билан гаплаштиришини маълум қилган.

Ҳамма ҳаракатлари ёлғон!

“Global avto” Telegram’даги каналида “мижозларга машина қилиб беришгани” ҳақида бир нечта видеолавҳаларни жойлаштирган. Уларнинг аксарияти Cobalt машинаси.

Жумладан, 2025 йил 15 июл куни мижозга Cobalt машинаси топширилгани ҳақида видеолавҳа эълон қилинган. Видеолавҳада машина ҳужжатлари ҳам кўрсатилган. Аммо ҳужжатдаги сотувчи фирма номи нимагадир яширилган.

Ҳужжатга кўра, Шаҳрисабз туманининг Сарчашма қишлоғида яшовчи фуқаро Кимё Шарипова ушбу машинани “Autograph Automotive Group” МЧЖдан сотиб олган.

Kun.uz Кимё Шарипованинг машинани сотиб олишда бош-қош бўлган жияни билан суҳбатлашди.

“Global avto”га бордик, улар бизни катта автосалонга олиб боришди, пулни ўша ерда тўладик ва машинани олдик. У бошқа фирма эди. Кейин “Global avto” офиси ёнига олиб бориб, тасвирга олишди. Биз машинанинг пулини тўлиқ тўлаган ҳолда сотиб олганмиз”, дейди у.

11 июл куни эълон қилинган видеолавҳада эса фуқаро Шерали Бекбўтаевга “ўзининг номига Cobalt расмийлаштириб берилгани” айтилади.

Бироқ ушбу машина аслида “Oscar Motorcars” МЧЖдан харид қилинган ҳамда “Global avto” офиси олдига олиб борилиб, тасвирга олинган.

Kun.uz вазиятга ойдинлик киритиш мақсадида “Oscar Motorcars” МЧЖ раҳбари билан боғланди. У фуқаро Шерали Бекбўтаевга ростдан ҳам машина сотилганини, аммо “Global avto” ҳақида эшитмаганини, ушбу фирма билан ўзаро шартнома ёки бошқа алоқалари йўқлигини маълум қилди.

“Global avto” худди шу каби “Luckycar”, “Toshkent Avtomarkaz”, “Mega Oil Biznes”, “Avtotexxizmat” каби МЧЖлар сотган машиналарни ҳам гўёки ўзлари мижозларга етказиб бергандай тасвирга олиб, эълон қилишган.

“Тўлов кечиксаям кечирамиз”

Бу “Global avto” вакиллари томонидан айтилаётган навбатдаги “ширин ваъда”. Фирма вакилига кўра, BYD Song Plus EV Champion машинаси 50 фоизлик бошланғич тўлов билан 3 йил муддатга йиллик 10 фоизли устамада бўлиб тўлашга берилади. Менежер агар машина нархининг 50 фоизи бошланғич тўлов сифатида тўланса, 2 йил муддатга фоизсиз бўлиб тўлашга ҳам берилишини маълум қилди. У машина нархи 340 млн сўм эканини айтган.

Шунингдек, менежер тўлов фирманинг ўзига тўланишини, бу банк эмаслигини, ойлик тўлов кечикса ҳам пеня қўшилмаслигини маълум қилди.

“Global avto” айни кунларда мижозлар билан “автомобилнинг бошланғич тўлови тўғрисида” шартнома тузмоқда. Қизиғи, унда сотувчи “ижарага берувчи”, харидор эса “ижарага олувчи” сифатида кўрсатилган. Шунингдек, шартнома бекор қилинганда тўланган сумма 50 иш кунида қайтарилиши белгиланган.

Одамлар алданмасин

“Global avto kredit” МЧЖнинг фаолияти ва бераётган ваъдаси Kun.uz суриштирувидан сўнг жиноий иш очилиб, раҳбарлари қамоққа олинган “Halal Auto Leasing kompany” МЧЖникига жуда ўхшаш. Ҳатто “Global avto kredit” фирмасида айнан “Halal Auto Leasing kompany” МЧЖда ишлаган менежерлар фаолият юритаётгани айтилмоқда.

Шу сабабли ҳуқуқни муҳофаза қилувчи органлар ушбу фирма фаолиятини кечиктирмасдан текшириб кўриши лозим. Йўқса, яна кўплаб одамлар алданиши мумкин.

Руслан Сабуров,
Kun.uz