Hududlarning investitsiyaviy jozibadorligi reytingi joriy etiladi

Hukumat qarori bilan «Reyting ko‘rsatkichlari asosida «Hududlarning investitsiyaviy jozibadorligi reytingi»ni baholash» reglamenti tasdiqlandi.

Reglament reyting ko‘rsatkichlari asosida hududlarning investitsiyaviy jozibadorligi reytingini baholash tartibini belgilaydi.

Reyting 2 yo‘nalishda baholanadi:

- investitsiya salohiyati. Mazkur yo‘nalishda statistik ko‘rsatkich va subko‘rsatkichlardan iborat bo‘lgan ustuvor omillar va ularning vaznlari asosida hududlar investitsiya salohiyati baholanadi;

- boshqaruv samaradorligi. Mazkur yo‘nalishda hududlarda tadbirkorlarning so‘rov natijalari orqali ko‘rsatkich va subko‘rsatkichlar asosida boshqaruv samaradorligi baholanadi.

Investitsiyalar, sanoat va savdo vazirligi reytingni baholash operatori bo‘lib, quyidagi vazifalarni bajarish uchun mas’ul hisoblanadi:

- baholash jarayonini umumiy muvofiqlashtirish;

- elektron platformani boshqarish;

- natijalarni taqdim etish.

Reyting ballari 4 ta bosqichda elektron platforma orqali hisoblanadi.

Baholash operatori reyting baholash natijalari bo‘yicha tahliliy ma’lumotnoma tayyorlaydi.