Latviya ichki ishlar vaziri Yanis Dombrava ijtimoiy tarmoqdagi sahifasida Belarus bilan chegara «texnik sabablarga ko‘ra» yopilganini ma’lum qildi. U hali Latviyaga qaytib ulgurmagan fuqarolarga mamlakatga kirish uchun boshqa yo‘nalishlardan foydalanishni tavsiya qildi.
Latviya Davlat chegara xizmati vakili Kristine Petersone ma’lum qilishicha, «Paterniyeki – Grigorovshchina» nazorat-o‘tkazish punktida axborot tizimlarida yuzaga kelgan nosozliklar tufayli ish to‘xtatilgan. Hozircha muammoni qachon bartaraf etish mumkinligi ma’lum emas.
Bundan bir kun avval Yanis Dombrava Latviya fuqarolarini Belarusga safar qilmaslik yoki u yerda bo‘lgan taqdirda tezroq mamlakatni tark etishga chaqirgan edi. Uning ta’kidlashicha, Belarus tomonidan amalga oshirilayotgan «gibrid migratsiya urushi» sharoitida ikki davlat o‘rtasida xavfsiz harakatlanish qiyinlashishi mumkin.
Shu bilan birga, qo‘shni Litvada ham chegara xavfsizligi bilan bog‘liq holatlar kuzatilmoqda. 28 iyul kuni Litva chegarachilari Belarus hududidan qazilgan yerosti tunnelini aniqlagan. Taxminan bir metr diametriga ega bo‘lgan tunnel Litva hududiga chiqishga ulgurmagan bo‘lsa-da, rasmiylar uni noqonuniy migrantlarni olib o‘tish uchun qurilgan deb hisoblamoqda.
Polshada esa 2025 yil davomida Belarus tomonidan qazilgan yerosti tunneli orqali 180 nafardan ortiq noqonuniy migrant mamlakatga kirgani qayd etilgan. Ularning qariyb 130 nafari ushlangan. Shuningdek, o‘tgan yili Polsha chegarachilari Belarus bilan chegarada shunday to‘rtta yerosti tunnelini aniqlagan.
