Air Samarkand xodimlariga maosh to‘lashda qiyinchilikka duch keldi

Air Samarkand aviakompaniyasi xodimlarning ish haqi bilan bog‘liq majburiyatlarini bajara olmayotgani haqida tarqalgan xabarlarni tasdiqladi.

“Aviakompaniya haqiqatan ham ish haqi to‘lovlari muddatlariga ta’sir ko‘rsatgan moliyaviy chaqiriqlarga duch keldi”, – deyiladi tashuvchining 29 senyatbr kungi bayonotida.

Air Samarkand izohiga ko‘ra, 2025 yil bahor-yoz oylarida kompaniyaning barcha samolyotlariga rejadan tashqari texnik xizmat ko‘rsatishga to‘g‘ri kelgan, “bu esa qisqa muddatlarda sezilarli va rejalashtirilmagan xarajatlarni talab qilgan”. Kompaniya buning uchun xodimlaridan uzr so‘ragan.

Bayonotda ish haqi bo‘yicha qarzdorlikni imkon qadar qisqa muddatda qoplash “rahbariyat oldidagi ustuvor vazifa” ekani ta’kidlangan. Buning uchun investorlar, buyurtmachilar va hamkorlar bilan muzokaralar olib borilayotgani aytilgan. Shuningdek, barcha samolyotlar to‘liq texnik ko‘rsatish siklidan o‘tkazilib, aviakompaniya shtat rejimida faoliyat yuritayotgani va xavfsizlik me’yorlariga muvofiq o‘rtacha sutkalik parvoz ko‘rsatkichlari ta’minlanayotgani qayd etilgan.

Mehnatga haq to‘lashda xodimning qaysi davlat fuqarosi ekani, lavozimi, ish staji va boshqa omillardan qat’i nazar, yondashuv barchaga bir xil, deya qo‘shimcha qilgan Samarkand Air.

27 senyatbr kuni “SHOT” Telegram-kanali bergan xabarga ko‘ra, Rossiyaning 50 ga yaqin fuqarosi O‘zbekistonning Air Samarkand aviakompaniyasini “3 oydan beri” maosh to‘lamayotganlikda ayblamoqda.

“Bir necha oydan buyon xodimlarga yegulik uchun ham pul berilmayapti, vaholanki yozda ham maxsus raport orqali bunday imkoniyat bor edi. Xodimlar turar joy ijarasi uchun ham pul berilmayotganini aytishmoqda. Shunga o‘xshash holat bahorda kuzatilgan, lekin o‘shanda bort kuzatuvchilari, uchuvchilar va boshqa xodimlar masalani yopib, o‘z maoshlarini ola olishgan”, – deyiladi “SHOT” xabarida.

Air Samarkand aviakompaniyasi 2022 yilda tashkil etilgan bo‘lib, 2024 yildan boshlab bir nechta xalqaro yo‘nalishlarda muntazam aviaqatnovlarni amalga oshirib kelmoqda.

“Sam Air” MChJning 51 foiziga Baxtiyor Fozilov, 49 foiziga Bahodir G‘afurov egalik qiladi. Fozilov, shuningdek, Samarqand xalqaro aeroportini ishonchli boshqaruvga olgan “Air Marakanda” MJChga ham affillangan.

Fozilov egalik qiladigan bir qator kompaniyalarda, xususan Enter Engineering'da vaqti-vaqti bilan oylik maoshlar kechikishi holatlari kuzatilib turadi.