Huggies tovar belgisidan noqonuniy foydalangan korxona jazolandi

Tovar belgisining egasi Raqobat qo‘mitasiga murojaat qilishi ortidan, brenddan noqonuniy foydalangan “Ahangaron Hygienic Pro” MChJga chora ko‘rildi.

Huggies savdo belgisidan noqonuniy foydalanish holati aniqlanib, bu borada tegishli chora ko‘rildi, deya xabar berdi Raqobatni rivojlantirish va iste’molchilar huquqlarini himoya qilish qo‘mitasi.

Qo‘mitaning Toshkent viloyati hududiy boshqarmasi “Kimberly-Clark” MChJning murojaati asosida unga tegishli Huggies savdo belgisi boshqa korxona – “Ahangaron Hygienic Pro” MChJ tomonidan noqonuniy ishlatilgani holatini o‘rganib chiqqan.

O‘rganishlar davomida shikoyat o‘z tasdig‘ini topgan va bu holat brend obro‘yiga salbiy ta’sir ko‘rsatayotgani aniqlangan.

“Ahangaron Hygienic Pro” MChJ moliyaviy jarimaga tortildi va qonunbuzilish holatini bartaraf etib, kelgusida bunday holatlarga yo‘l qo‘ymaslik bo‘yicha ko‘rsatma berildi, deyiladi xabarda.