Taniqli fotosuratchi tutqich bermas silovsinlarning noyob suratlarini e’lon qildi

Ko‘plab mukofotlar laureati, tabiatda ishlovchi fotograf Stiv Uinter Nyu-Jyersida, shu jumladan tunda va qorda silovsinlarni suratga olish uchun simsiz fotoqopqonlardan foydalandi.

Ellik yil avval Nyu-Jyersi shtatida silovsinlar yo‘qolib ketgan. Olimlar ularni yovvoyi tabiatga qaytardi, ammo o‘zgaruvchan iqlim va ortib borayotgan urbanizatsiya sharoitida omon qolish uchun ularga ko‘proq joy kerak.

Uinter Nyu-York shahridan 100 kilometr shimoli-g‘arbda joylashgan Nyu-Jyersi shtatidagi Johnsonburg Swamp Preserve qo‘riqxonasida silovsinlarni suratga oldi. Ushbu 700 akr maydon shtatning shimoli-g‘arbiy qismida yaratilgan muhim yashil koridor bo‘lgan «Silovsin alleyasi» uchun asosiy nuqtadir. Tor yo‘llar bo‘ylab Uinter o‘ta keng burchakli obektivlar va kameralar hamda chiroqlar uchun korpuslar bilan fotoqopqonlarini o‘rnatdi.

Indianada tug‘ilgan fotojurnalist Stiv Uinter o‘z faoliyatini Black Star agentligida boshlagan va yovvoyi tabiatni suratga olishga to‘liq vaqtini bag‘ishlagan. U o‘ttiz yildan ortiq vaqtdan beri National Geographic bilan hamkorlik qilib keladi. Katta mushuksimonlar fotografiyasiga ixtisoslashgan Uinter xalqaro e’tirof va ko‘plab mukofotlarga sazovor bo‘ldi, jumladan, VBC Wildlife Photographer of the Year va BBC Wildlife Photojournalist of the Year, shuningdek, eng yaxshi tabiat haqidagi hikoya uchun World Press Photo mukofotiga. U ikki marta Picture of the Year International Global Vision Award mukofoti laureatiga aylangan.

Uinterning suratlari Nyu-Jyersidagi olimlar va tabiatni muhofaza qiluvchilar tomonidan yuqori baholandi: u silovsinlar populyatsiyasining tiklanishini va ularning yovvoyi go‘zalligini aks ettiradi.