“Hech kim tezak qilmay qo‘ydi” – Qumqo‘rg‘on tumani hokimi qish uchun tappi-tezak g‘amlashga chaqirdi

Surxondaryo viloyati Qumqo‘rg‘on tumani hokimi Anvar Normamatov mahalliy kengash sessiyasida odamlar tezak qilmay qo‘yganini aytib, buni xalqqa tushuntirish kerakligini bildirgan. “Nimaga endi biz gaz-gaz deb qoldik? Gazning tagi bo‘lsa qani, yo‘q-da shu”, degan hokim.

Qumqo‘rg‘on tumani hokimi Anvar Normamatov odamlar tezak qilmay qo‘yganini aytdi. Hokim bu haqda xalq depatutlari Qumqo‘rg‘on tumani kengashining 2025 yil 12 sentabr kuni o‘tkazilgan navbatdagi X sessiyasida gapirgan.

Sessiyada bir nechta masalalar ko‘rib chiqilgan. Jumladan, “Qumqo‘rg‘on tuman gaz” filiali boshlig‘i I.Mustafoqulovning hisoboti tinglangan.

Jarayonda sessiyaga rahbarlik qilayotgan tuman hokimi kuz-qish mavsumiga tayyorgarlik borasida ham to‘xtalib o‘tgan.

“Mutaxassislar tomonidan bu yil qish sovuq keladi degan prognoz qilinyapti. Biz ham shunga yarasha tayyorgarlik ko‘rishimiz zarur. Qor, yomg‘ir yog‘gan kunlari xalq qiynalmasligi kerak...

Mana, oddiy bir tezak, hozir hech kim tezak qilmaydi. Uylarga tezak, chalmalarni yig‘ib, bosib, qishda qor yog‘dimi, ikkita taylab qo‘ysa bo‘ladi-ku. Nimaga endi biz gaz-gaz deb qoldik? Tushungan bo‘lganlaring uchun aytyapman, gazning tagi bo‘lsa qani, tagi yo‘q-da shuning”, degan tuman hokimi.

Shuningdek, hokim tumanning 90 foiz aholisi buni tushunib turganini, 10 foizi tushunmasligini ma’lum qilgan. “Odamlarga yana bir marta tushuntirishimiz kerak”, degan u.

Anvar Normamatov 2022 yil iyun oyidan beri Qumqo‘rg‘on tumaniga hokimlik qilib keladi. Bungacha u Termiz shahri bo‘yicha ichki ishlar organlari faoliyatini muvofiqlashtirish boshqarma boshlig‘i lavozimida ishlagan.

Ma’lumot uchun, tezak chorva mollari go‘ngini quritib, tayyorlanadigan yoqilg‘i turi hisoblanadi. Undan asosan qishloq joylarida foydalaniladi.