«Xalq hammasini ko‘rib o‘tiribdi» – Samarqand viloyati hokimi amaldorlar orasidagi korrupsiya haqida

Samarqand viloyati hokimi vazifasini bajaruvchi Adiz Boboyev korrupsiyaga qarshi kurashish va davlat organlari ochiqligini kuchaytirish masalalari bo‘yicha o‘tkazilgan yig‘ilishda mutasaddilarni korrupsiyaga qarshi shaxsiy namuna ko‘rsatib kurashishga chaqirdi.

15 oktyabr kuni tadbirda tuman va shahar hokimlari, huquq-tartibot idoralari, ta’lim tizimi, sog‘liqni saqlash va boshqa idoralar vakillari ishtirok etgan.

Viloyat hokimligi matbuot xizmati e’lon qilgan videoda Adiz Boboyev korrupsiyani «aholining davlat hokimiyatiga bo‘lgan ishonchiga putur yetkazuvchi illat» deb atagan va unga qarshi kurashni rahbarlarning o‘zidan boshlash kerakligini ta’kidlagan.

«Qachon to‘xtatamiz bu korrupsiyani? Oyliklar oshgan bo‘lsa, bajarayotgan ishi uchun daromadi yomon bo‘lmasa... rahbarlar shu ishni qilayotgan bo‘lsa, qolganlar falonchi, boshlig‘im oldi-ku, men nima uchun olmasligim kerak deydi. Keyin uyam qo‘shiladi. Keyin keyin uchinchisi qo‘shiladi, keyin to‘rtinchisi qo‘shiladi. Bo‘ldi shu bilan

keyin hamma viloyatdan boshlab, to tuman va mahallagacha, hammasi pastga tushguncha to‘liq ketaveradi. Chunki tepada boshlandimi, pastga qarab davom etadi. Hamma narsa sizlarga bog‘liq», – degan u.

Viloyat rahbari har bir rahbar shaxsiy namuna ko‘rsatishi lozimligini qayd etgan.

«Agar siz to‘g‘ri ishlasangiz, pastdagilar ham sizlarga qarab, aytadi: „Iye shoshma, tepadagilar to‘g‘ri ishlayapti-ku, men ham to‘g‘ri ishlashim kerak“. Shunda ular ham to‘g‘ri ishlaydi va ulardan pastdagilar ham to‘g‘ri ishlaydi. Bo‘lmasa buning oxiri yo‘q. Xalq ko‘rib turibdi. Nima deb o‘ylaysizlar, xalq bilmaydimi? Xalq hammasini bilib o‘tiribdi, hammasini ko‘rib o‘tiribdi. Kim qanday qilib uy qilgan, kim qanday mashina qilgan, bilmaydi deb o‘ylaysizlarmi? Hamma biladi. Hamma o‘zi uchun xulosa qilib olsin, birinchidan, o‘ziga xulosa qilib olsin, ikkinchidan, boshqalarga ham o‘rnak bo‘lsin», – deya qo‘shimcha qilgan Adiz Boboyev.

Yig‘ilish yakunida profilaktik ishlarni yanada kuchaytirish, mehnat jamoalari va mahallalarda targ‘ibot ishlarini olib borish, halol mehnat qilish ko‘nikmalarini mustahkamlashga qaratilgan amaliy choralar ko‘rilishi yuzasidan ko‘rsatmalar berildi, deya ta’kidlagan hokimlik matbuot xizmati.