O‘zbekistonliklarning Serbiyada ishga joylashishi jarayoni soddalashadi

Toshkentda bo‘lib o‘tgan uchrashuvlarda O‘zbekiston va Serbiya o‘rtasida mehnat migratsiyasi bo‘yicha anglashuv memorandumi imzolandi. Hujjat o‘zbekistonlik fuqarolarni Serbiyada qonuniy asosda ishga qabul qilish tartibini muvofiqlashtirish va soddalashtirishni ko‘zda tutadi.

Foto: Prezident matbuot xizmati

Prezidentlar uchrashuvi doirasida hukumatlararo va idoralararo hujjatlar to‘plami qabul qilindi. Jumladan, O‘zbekiston Vazirlar Mahkamasi huzuridagi Migratsiya agentligi va Serbiyaning Mehnat, bandlik, faxriylar va ijtimoiy masalalar vazirligi mehnat migratsiyasi sohasida hamkorlik to‘g‘risida memorandum imzoladi.

Nima o‘zgaradi?

qonuniy bandlik: o‘zbekistonliklarni Serbiyada ishga qabul qilish tartibi birxillashtiriladi, hujjat aylanmasi va talablar aniqlashtiriladi;
huquqiy himoya: xorijda ishlayotgan fuqarolarning mehnat huquqlarini himoya qilish bo‘yicha hamkorlik kuchayadi;
profilaktika: noqonuniy mehnat migratsiyasining oldini olish uchun qo‘shma chora-tadbirlar amalga oshiriladi;
tajriba almashish: bandlik tizimidagi ilg‘or amaliyotlar bo‘yicha o‘quvlar, seminarlar va axborot almashinuvi yo‘lga qo‘yiladi.

Ikki tomon qonunchilikni monitoring qilish, ma’lumot almashish va qo‘shma maslahatlashuvlar o‘tkazishni tizimli asosda yo‘lga qo‘yadi.

O‘zbekiston fuqarolarini Serbiyada ishga qabul qilish tartib-tamoyillarini muvofiqlashtirish uchun alohida texnik bayonnoma ishlab chiqiladi.

Memorandum ikki davlat yetakchilari huzurida imzolangan hujjatlar to‘plamining bir qismidir va O‘zbekiston–Serbiya munosabatlarida mehnat bozoridagi hamkorlikni chuqurlashtirishni maqsad qiladi.