AQSh «Rosneft»ning Germaniyadagi aktivlarini yarim yilga sanksiyadan chiqardi

Rosneft Deutschland va RN Refining & Marketing bilan operatsiyalarga 2026 yil 29 aprelgacha ruxsat berildi, deb ko‘rsatilgan AQSh Moliya vazirligining litsenziyasida. Ilgari “Rosneft” AQSh sanksiyalar ro‘yxatiga kiritilgan edi.

Foto: Patrick Pleul/dpa-Zentralbild/picture alliance

AQSh Moliya vazirligi “Rosneft”ning Germaniyadagi shu’ba korxonalari bilan kelasi yarim yil davomida operatsiyalar o‘tkazishga umumiy litsenziya berdi. 29 oktyabr kuni e’lon qilingan hujjatda shunday deyiladi: “Rosneft Deutschland GmbH yoki RN Refining & Marketing GmbH, yoki ular 50 foiz va undan ortiq ulushga ega bo‘lgan istalgan tashkilot ishtirokidagi barcha tranzaksiyalarga 2026 yil 29 aprel kuni soat 00:01gacha ruxsat etiladi”.

Bundan bir kun oldin FRG iqtisodiyot vaziri Katerina Rayxe Germaniyada tashqi boshqaruvda turgan “Rosneft” aktivlari Rossiya neft sektoriga qarshi AQShning yangi sanksiyalari ta’siriga tushmasligini aytdi. U buni Vashington tomonidan yuborilgan “kafolat xati” bilan izohladi.

Bloomberg yozganidek, AQSh “Rosneft”ning Germaniyadagi shu’ba korxonalarining mulkdorlik tuzilmasini tartibga solish uchun olti oylik muddat bergan. AQSh prezidenti Donald Tramp ma’muriyati nemis tomoniga Rosneft Deutschland’ga yangilanmaydigan cheklangan umumiy litsenziya berish imkoniyatini ko‘rib chiqayotganini ma’lum qilgan, deb xabar qildi agentlik manbalari.

22 oktyabr kuni AQSh Ukrainadagi urushni tugatish bo‘yicha “Rossiyaning jiddiy manfaatdor emasligi”ni sabab sifatida keltirib, RFga nisbatan yangi sanksiyalar joriy etdi. “Rosneft” va “Lukoyl” kabi Rossiyaning ikki yirik neft kompaniyasi, shuningdek, ularning shu’ba korxonalari “qora ro‘yxat”ga kiritildi.

Bundan tashqari, “50 foiz va undan ortiq ulushi bloklangan shaxs(lar)ga tegishli har qanday yuridik shaxslar” ham to‘liq to‘sib qo‘yildi. Qoidalarni buzgan taqdirda “AQSh fuqarolari va xorijiy fuqarolarga nisbatan fuqaroviy-huquqiy yoki jinoiy sanksiyalar” qo‘llanishi mumkinligi qayd etilgan.

Rossiya Ukrainaga bosqin boshlagandan so‘ng, Germaniya hokimiyati “Rosneft”ning Rosneft Deutschland va RN Refining & Marketing ustidan nazorat qilish huquqini bekor qilib, ularni Federal tarmoq agentligi (Bundesnetzagentur)ning tashqi ishonchli boshqaruviga o‘tkazgan, biroq mulk huquqi “Rosneft”da saqlanib qolgan.

Rosneft Deutschland Germaniya neftini qayta ishlash quvvatining taxminan 12 foizini nazorat qiladi. Kompaniya mamlakatdagi uchta yirik NQZda ulushga ega: Shvedt shahridagi PCK Schwedt, Karlsruedagi MiRo va Foburg-Dunaydagi Bayernoil.