Shavkat Mirziyoyev YuNeSKO 43-sessiyasining ochilishida qatnashadi

YuNeSKO bosh konferensiyasining tarixiy 43-sessiyasi qirq yil ichida birinchi marta tashkilotning Parijdagi qarorgohidan tashqarida — Samarqand shahrida o‘tmoqda. Forumning mamlakatda o‘tkazilishi O‘zbekistonning YuNeSKO qadriyatlariga sodiqligi, shuningdek, tinchlik, o‘zaro anglashuv va barqaror taraqqiyot yo‘lidagi global muloqotni rivojlantirishga qaratilgan sa’y-harakatlariga yana bir dalildir.

Sessiya doirasida ta’lim, fan, madaniyat, ekologiya, texnologiya va kommunikatsiya sohalaridagi ustuvor mavzularga bag‘ishlangan 150 dan ortiq tadbir o‘tkazilishi rejalashtirilgan.

Anjumanda 200 dan ziyod davlat va xalqaro tashkilotlardan yuqori darajadagi delegatsiyalar qatnashadi. Qatnashchilar orasida Serbiya prezidenti Aleksandr Vuchich, Slovakiya prezidenti Peter Pellegrini, YuNeSKO bosh direktori Odri Azule va boshqa faxriy mehmonlar ham bor.

Ma’lumot uchun: YuNeSKO — BMTning ixtisoslashgan muassasasi bo‘lib, 1945 yilda tashkil etilgan. O‘zbekiston 1993 yildan tashkilotning to‘la huquqli a’zosi, 1996 yilda Toshkent shahrida YuNeSKO vakolatxonasi ochilgan.