O‘zbekiston yoshlar o‘rtasidagi Osiyo o‘yinlarida tarixiy natijani qayd etdi

Bahrayn poytaxti Manama shahrida 30 oktabr kuni yoshlar o‘rtasidagi uchinchi Osiyo o‘yinlari yakunlandi. O‘zbekiston sportchilari unda muvaffaqiyatli ishtirok etib, umumjamoa hisobida ikkinchi o‘rinni egalladi.

Osiyo o‘yinlarida mutlaq g‘oliblikni Xitoy sportchilari qo‘lga kiritdi. Ularning hisobida 147 ta medal (63 oltin, 49 kumush, 35 bronza) bor.

O‘zbekiston 81 ta medal (37 oltin, 16 kumush, 28 bronza) bilan ikkinchi bo‘ldi. Bu o‘zbekistonliklarning yoshlar o‘rtasida Osiyo o‘yinlari tarixidagi eng yaxshi natijasidir.

O‘zbekistonliklar 183 nafar sportchi bilan 20 ta sport turida ishtirok etdi.

Eng ko‘p medalni dzyudochilar keltirdi 14 ta (7 oltin, 4 kumush, 3 bronza). Og‘ir atletikachilar (7 oltin, 2 kumush, 4 bronza) va sport kurashchilari (3 oltin, 2 kumush, 8 bronza) hisobida 13 tadan medal bor. Shuningdek, bokschilar 10 ta (5 oltin, 3 kumush, 2 bronza) medal bilan umumjamoa muvaffaqiyatiga salmoqli hissa qo‘shdi.

Og‘ir atletikachilardan Munisbek Davletov, Marjona Abdumutalova va Dilnura Xoldorova Osiyo o‘yinlarida 2 tadan oltin medalni qo‘lga kiritdi.

Medalchilarning 35 nafari ayollar bo‘lib, 13 nafari oltin medal sohibi bo‘ldi.

Umumjamoa hisobida uchinchi o‘rinni Qozog‘iston (24 oltin, 29 kumush, 40 bronza), to‘rtinchi o‘rinni Eron yoshlari (22 oltin, 18 kumush, 36 bronza) egalladi.

Qo‘shnilardan Tojikiston 18-o‘rinda (2 oltin, 3 kumush, 15 bronza), Qirg‘iziston 21-o‘rinda (1 oltin, 9 kumush, 11 bronza), Turkmaniston 27-o‘rinda (1 oltin, 1 kumush, 4 bronza) qayd etildi.

Eslatib o‘tamiz, 2013 yilda Xitoyning Nankin shahrida o‘tkazilgan ikkinchi Osiyo o‘yinlarida O‘zbekiston 14-o‘rinni (1 oltin, 2 kumush, 5 bronza) egallagan edi. 2009 yilda Singapurda o‘tkazilgan birinchi Osiyo o‘yinlarida O‘zbekiston 20-o‘rinda (3 bronza) qayd etildi. Aytish joiz, ushbu musobaqalarda sport turlari va ishtirokchilar soni ancha kam bo‘lgan.