Chilonzor tumanida tez ovqat tayyorlash shoxobchasida yong‘in sodir bo‘ldi

Bugun, 4 noyabr kuni soat 01:26 da Chilonzor tumani Qatortol ko‘chasida joylashgan tez ovqat tayyorlash shoxobchasi binosida yong‘in yuz berdi. Yong‘in-qutqaruv xizmati hodisani qisqa fursatda bartaraf etdi, jabrlanish holatlari qayd etilmadi.

Foto: Ijtimoiy tarmoqlar

Toshkent shahar Favqulodda vaziyatlar boshqarmasi ma’lumotiga ko‘ra, xabar soat 01:26 da qabul qilingan. Yong‘in-qutqaruv ekipaji soat 01:34 da voqea joyiga yetib kelgan.

Qutqaruvchilar harakatlari natijasida yong‘in soat 01:45 da qurshab olingan va soat 01:48 da to‘liq o‘chirilgan. Hodisa oqibatida tan jarohati olganlar yo‘q.

Yong‘inning kelib chiqish sababi va yetkazilgan moddiy zarar miqdorini aniqlash bo‘yicha tekshiruv ishlari olib borilmoqda.