Toshkent shahar onkologiya markaziga qarashli 4,36 gektar hududda poytaxt aholisi uchun ochiq yashil bogʻ barpo etish rejalashtirilmoqda. Bu haqda shahar hokimligi maʼlum qildi.
Loyiha «Yashil shahar» konsepsiyasi doirasida amalga oshiriladi. Hududdagi binolar boʻshatilgach, ular buzib tashlanmaydi, balki rekonstruksiya qilinib, yoshlar shaharchasiga moslashtiriladi.
U yerda oʻquv va ijodiy markazlar, kutubxona, kovorking hududlari, simulyatsiya ustaxonalari va startap-studiyalar tashkil etiladi.
Hokimlikning taʼkidlashicha, yoshlar shaharchasi yashil bogʻning oʻrnini egallamaydi va koʻkalamzor hudud maydoni qisqartirilmaydi. Shuningdek, loyihada alohida biznes-ofislar yoki boshqa tijorat obyektlarini qurish rejalashtirilmagan.
Taʼkidlanishicha, binolar atrofi obodonlashtirilib, koʻkalamzorlashtiriladi. Hududning asosiy qismi esa barcha shaharliklar foydalanishi mumkin boʻlgan ochiq jamoat bogʻi sifatida saqlanadi.
