Maldivda 2007 yildan keyin tug‘ilganlarga chekish taqiqlandi

Maldiv orollari yosh avlod uchun chekishga umummilliy taqiq joriy etilgan dunyodagi birinchi davlat bo‘ldi: orol davlati hukumati 2007 yil 1 yanvardan keyin tug‘ilganlarning barchasiga, shu jumladan sayyohlarga chekishni va tamakini targ‘ib qilishni taqiqladi.

Mahalliy sog‘liqni saqlash vazirligi o‘tgan dam olish kunlari mamlakat hududida yosh avlod uchun tamaki iste’mol qilish, sotib olish yoki sotish noqonuniy bo‘lishini e’lon qildi.

Taqiq «hukumatning yoshlarni tamaki zararidan himoya qilishga qat’iy sodiqligini aks ettiradi», dedi vazirlik.

Maldiv Respublikasi tamakiga qarshi kurash kengashi raisi o‘rinbosari Ahmad Afaal BBC bilan suhbatda mamlakatda o‘tgan yili e’lon qilingan veypingga umumiy taqiq «tamaki iste’mol qilmaydigan fuqarolar avlodi yo‘lidagi yaxshi qadam» bo‘lganini aytgan.

Yangi taqiq «barcha turdagi tamakiga nisbatan qo‘llanadi va sotuvchilar xaridorlarning yoshini tekshirishi shart», deyildai Sog‘liqni saqlash vazirligi bayonotida. Bu davlatning Jahon sog‘liqni saqlash tashkilotining Tamakiga qarshi doiraviy konvensiyasi doirasidagi majburiyatlariga mos kelishi qo‘shimcha qilingan.

BMTning sog‘liqni saqlash masalalari bo‘yicha organi ma’lumotlariga ko‘ra, ushbu konvensiya «global muammoga, ya’ni tamaki chekish epidemiyasiga global javob bo‘ladi».

Afaal veyping taqiqlanishi dastlabki muhim qadam bo‘lgani, chunki «bu yangi zamonaviy gadjetlar – yosh avlodni ularning sog‘lig‘iga aniq zarar yetkazadigan odatga aylantiruvchi jarayonlarga jalb qilishga qaratilgan sanoat taktikasi hisoblanishi»ni ta’kidlagan.

O‘tgan yili Maldiv orollari yoshidan qat’i nazar, elektron sigaretalar va veyping mahsulotlarini olib kirish, sotish, saqlash, ulardan foydalanish yoki tarqatishni taqiqlagandi.

Osiyoning ko‘plab davlatlarida elektron sigaretalar va veyplarga shunga o‘xshash taqiqlar allaqachon amal qilmoqda. Masalan, Singapurda bunday qurilmalarni olib kirish, saqlash va ulardan foydalanish uchun katta jarimalar belgilangan.

Maldiv orollariga kelgan sayyohlar ham qonunga rioya qilishi kerak bo‘ladi, ammo Afaalning ta’kidlashicha, chekishni taqiqlash turizm sanoatiga ta’sir qilmaydi.

«Odamlar Maldiv orollariga chekish uchun kelishmaydi. Ular plyajlar, dengiz, quyosh va toza havo uchun kelishadi. Kelgusi yilda 2 milliondan ortiq [turistlar] kelishini prognoz qilyapmiz», – deya qo‘shimcha qildi u.

Shunga o‘xshash taqiqni Yangi Zelandiya ham joriy etmoqchi edi, biroq 2023 yilda yangi hukumat hokimiyatga kelishi bilan bu rejalar keyinga qoldirildi.

Buyuk Britaniyaning sobiq bosh vaziri Rishi Sunak ham 2009 yilda yoki undan keyin tug‘ilgan yoshlarga chekishni taqiqlovchi qonunni qabul qilmoqchi bo‘lgan.

Hozirgi leyboristlar hukumati ushbu qonunning o‘z versiyasini kiritdi, u hozirda parlamentda ko‘rib chiqilmoqda.