Yangi saylangan Nyu-York meri o‘zining birinchi nutqida o‘zbeklarga ham minnatdorlik bildirdi. Zohran Mamdani Nyu-York tarixidagi birinchi musulmon, Afrikada tug‘ilgan, 1892 yildan beri saylangan eng yosh mer bo‘ldi. Biroq prezident Tramp uni «kommunist» deya atab, mablag‘ ajratmaslik bilan qo‘rqitmoqda.
Xabaringiz bor, demokratlardan bo‘lgan Zohran Mamdani endi Nyu-Yorkning yangi meri. Bu shaxsning rostdan ham e’tiborni tortuvchi bir qancha tomonlari bor. Birinchidan u 1892 yildan beri saylangan eng yosh mer, Nyu-Yorkning birinchi musulmon meri hamda Afrikada tug‘ilgan odam birinchi marta bu lavozimga saylanmoqda. Aslida u o‘tgan yili merlik uchun poygaga kam pul, institutsional partiya yordamisiz kirgan edi. Lekin uning sobiq gubernator Endryu Kuomo va respublikachi nomzod Kertis Slivadan ham o‘tib ketib, g‘alaba qozonishi olamshumul voqelik bo‘lmoqda.
Zohran Mamdanining yosh va xarizmatik ekani ham g‘alabaga yordam berdi, deb yozadi BBC.
Uning etnik kelib chiqishi esa partiya tarkibining xilma-xilligini aks ettiradi. Mamdani siyosiy kurashdan qochmadi va g‘urur bilan chap qanot dasturini qo‘llab-quvvatladi. Masalan, bepul bolalar parvarishi, kengaytirilgan jamoat transporti va hukumatning erkin bozor tizimiga aralashuvi kabi takliflarni ilgari surdi, deya qo‘shimcha qiladi ushbu nashr.
Saylov oldidan tanqidchilar Amerikaning keng doiralarida bunday nomzodni saylab bo‘lmaydi, deb ogohlantirdi. Shunga qaramay, seshanba kuni kechqurun u Nyu-Yorkning yangi meri bo‘lishi oydinlashdi.
Nyu-Yorkning sobiq gubernatori, o‘zi gubernatorning o‘g‘li bo‘lgan Endryu Kuomoga qarshi kurashib, uni mag‘lub etish – Mamdani uchun katta natija edi.
Shu jihatdan ham Zohranning merlik kampaniyasi ommaviy axborot vositalarining katta e’tiborini tortdi, ehtimol munitsipal saylovlardan ko‘ra ko‘proq, hatto Amerikaning eng yirik shahri uchun ham.
Lekin endi hokim sifatida uning muvaffaqiyatlari va muvaffaqiyatsizliklari diqqat bilan tekshiriladi, omma e’tiborida bo‘ladi.
Bundan o‘n ikki yil oldin demokrat Bill de Blasio Nyu-York shahrining iqtisodiy va ijtimoiy tengsizliklarini hal qilish takliflari bilan merlik uchun kurashda g‘olib chiqqandi. Mamdaniga o‘xshab, chap qanotdagi amerikaliklar ham uning ma’muriyati samarali liberal boshqaruvning milliy namunasini taqdim etishiga katta umid bog‘lashgan.
