RF Bosh prokuraturasi Xodorkovskiy ta’sis etgan litseyni milliylashtirishni so‘ramoqda

Rossiya Bosh prokuraturasi Moskva yaqinida, Korallovo posyolkasida joylashgan “Podmoskovnyy” litsey-internati — YuKOSning sobiq egasi va hozir xorijdagi rossiyalik muxolifat yetakchilaridan biri Mixail Xodorkovskiy hamda uning hamkori Platon Lebedev tashkil etgan muassasani milliylashtirishni talab qildi. Mos da’vo Meshchanskiy tuman sudiga kiritilgani haqida “Interfaks”ga 6 noyabr kuni ushbu hujjat bilan tanish manba xabar berdi.

“Nazorat tadbirlari jarayonida umumta’lim muassasasi — ‘Litsey-internat “Podmoskovnyy”’ ijro ishi bo‘yicha qarzdorlar — Xodorkovskiy va Platon Lebedevga amalda tegishli ekani aniqlandi. Shu sabab u davlat daromadiga o‘tkazilishi lozim”, — deb manbaning so‘zlaridan iqtibos keltiradi agentlik. Ta’minot chorasi sifatida prokuratura litsey mol-mulki, jumladan pul mablag‘lariga ham hibs qo‘yishni so‘ramoqda.

Da’voda litseydagi ta’lim “siyosiy jihatdan o‘zgacha” ekani va bolalarda “Rossiyaga qarshi ko‘rinishlarga loyal munosabat” shakllantirayotgani iddao qilingan. Shuningdek, Bosh prokuratura ma’lum qilishicha, litsey RFda “nomaqbul tashkilot” deb e’lon qilingan “Xodorkovskiy jamg‘armasi”, shu bilan birga sud Xodorkovskiy va Lebedevga tegishli, deb topgan “Parringrouv” kompaniyasi mablag‘lari hisobidan moliyalashtiriladi.

Iqtidorli yetim bolalar va ijtimoiy himoyaga muhtoj guruhlardan chiqqan bolalar uchun mo‘ljallangan “Podmoskovnyy” litsey-internati 1994 yilda Odinsovo tumanidagi sobiq dvoryan usadbasida ochilgan. “Nastoyashcheye vremya” telekanali ta’kidlashicha, u yerda terror hujumlaridan jabrlangan bolalar va halok bo‘lgan harbiy xizmatchilarning farzandlari ham o‘qigan. Rossiya rasmiylariga ko‘ra, litsey mulki tarkibiga 86 gektar yer, 5 ta turar va 40 ta noturar binolar (umumiy maydoni 25 ming kvadrat metrdan ortiq) kiradi.

Oktyabr o‘rtalarida RF FSB Mixail Xodorkovskiy va “Rossiyaning Urushga qarshi qo‘mitasi”ning boshqa ishtirokchilariga nisbatan “hokimiyatni zo‘ravonlik bilan egallash” va “terroristik uyushma tashkil etish yoki unda ishtirok etish” moddalari bo‘yicha jinoyat ishi qo‘zg‘atilganini ma’lum qildi. FSB ta’kidlashicha, 2022 yil fevralda tashkil etilgan ushbu qo‘mitaning maqsadlari “hokimiyatni zo‘ravonlik bilan egallash” va Rossiyada “konstitutsiyaviy tuzumni o‘zgartirish”dir. Xodorkovskiy 2013 yilda YuKOS bo‘yicha uchta ish doirasida koloniyada 10 yil o‘tkazganidan so‘ng ozod etilgan va shu paytdan beri chet elda yashab keladi.