Moskva sudi Xodorkovskiy tashkil etgan litseyni milliylashtirdi

Moskvaning Meshchanskiy sudi Odinsovo tumani Korallovo qishlog‘ida joylashgan, YuKOS neft kompaniyasining sobiq egasi va xorijdagi rossiyalik muxolifat yetakchilaridan biri Mixail Xodorkovskiy hamda uning hamkori Platon Lebedev tomonidan tashkil etilgan “Podmoskovnyy” litsey-internatini davlat mulkiga o‘tkazish to‘g‘risida qaror chiqardi. Xususiy ta’lim muassasasini milliylashtirishni RF Bosh prokuraturasi talab qilgan edi. 6 noyabr kungi qaror bilan prokuratura da’vosi qondirildi, deb xabar berdi Moskva umumiy yurisdiksiya sudlari matbuot xizmati 7 noyabr kuni.

“Interfaks” yozishicha, prokuratura so‘raganidek, sud qarori darhol ijro etilishi lozim. Litsey manfaatlarini vakil bo‘lib himoya qilgan advokat Oleg Ilin agentlikka qaror ustidan shikoyat berilishini aytdi.

Majlis davomida litsey vakillari muassasa Xodorkovskiydan hech qanday moliyaviy mablag‘ olmagani, o‘qituvchilar chet elda tayyorgarlik kurslaridan o‘tmaganini bildirdi. Shuningdek, ularning ta’kidicha, litseyning Xodorkovskiy fondi yoki shaxsan u bilan hech qanday munosabati yo‘q.

Bosh prokuratura litseyni milliylashtirish zarurligini uning “amalda ijro hujjatlari bo‘yicha qarzdorlar” — Mixail Xodorkovskiy va uning biznes-hamkori, “Menatep” sobiq rahbari Platon Lebedevga tegishli ekani bilan izohladi. Da’vo arizasida ta’lim muassasasi “RFda nomaqbul tashkilot” deb e’lon qilingan “Xodorkovskiy fondi” hamda sud mulki Xodorkovskiy va Lebedevga tegishli deb topgan “Parringrouv” kompaniyasi mablag‘lari hisobidan moliyalashtirilayotgani aytilgan. Bundan tashqari, prokuratura litseydagi ta’lim “siyosiy jihatdan noto‘g‘ri” bo‘lib, bolalarda “antirossiya ko‘rinishlarga nisbatan loyal munosabat” shakllantirayotganini da’vo qildi.

Iqtidorli yetim bolalar va ijtimoiy himoyaga muhtoj guruhlarga mansub bolalar uchun mo‘ljallangan “Podmoskovnyy” litsey-internati 1994 yilda Moskva viloyati Odinsovo tumanidagi sobiq dvoryanlar usadbasida ochilgan. “Nastoyashcheye vremya” telekanali qayd etishicha, u yerda terroristik hujumlardan jabr ko‘rgan bolalar va halok bo‘lgan harbiy xizmatchilarning farzandlari ham tahsil olgan. Rossiya rasmiylariga ko‘ra, litsey mulki tarkibida 86 gektar hudud, beshta turar joy va 40 ta noturar binodan iborat 25 ming kvadrat metrdan ortiq maydon mavjud.

Oktyabr o‘rtalarida RF FSB Mixail Xodorkovskiy va “Rossiyaning Urushga qarshi qo‘mitasi”ning boshqa ishtirokchilariga nisbatan jinoiy ish qo‘zg‘atilganini e’lon qildi. Ular “hokimiyatni zo‘ravonlik yo‘li bilan egallash” hamda “terroristik hamjamiyatni tashkil etish yoki unda ishtirok etish” moddalarida ayblanmoqda. FSBga ko‘ra, 2022 yil fevralda RFning Ukrainaga qarshi to‘laqonli hujumi boshlangach tuzilgan mazkur qo‘mitaning maqsadlari “hokimiyatni zo‘ravonlik bilan egallash” va “konstitutsiyaviy tuzumni o‘zgartirish”dan iborat. Xodorkovskiy 2013 yilda YuKOS ishi bo‘yicha 10 yil koloniyada bo‘lganidan keyin ozod etilganidan beri xorijda yashab keladi.