Bundesver generali: Rossiya NATOga ertagayoq hujum qilishi mumkin

Rossiya istalgan paytda NATO mamlakatlariga cheklangan ko‘lamda zarba berishga qodir, deb hisoblaydi Bundesverning operativ qo‘mondonligini boshqarayotgan general-leytenant Aleksander Zollfrank. «Hozir Rossiya nimaga ega va u shu bilan nima qila olishini hisobga olish kerak, — dedi Zollfrank 7 noyabr kuni Reuters agentligiga bergan intervyusida. — Shu nuqtadan kelib chiqib, Rossiya ertagayoq NATO hududiga kichik ko‘lamda zarba berishi mumkin».

Nemis generali bunda «hududiy darajadagi kichik, tezkor hujumlar»ni nazarda tutayotganini aytdi: «Katta amaliyot emas — buning uchun Rossiya Ukrainada juda band». Shu bilan birga, agar Moskva qurollanishni davom ettirsa, Zollfrank 2029 yilga borib keng ko‘lamli hujum ham yuz berishi mumkinligini istisno etmadi. Ammo bu ro‘y berishi, uning fikricha, katta darajada G‘arbning pozitsiyasi va o‘zini tutishiga bog‘liq bo‘ladi.

Bundesver operativ qo‘mondonligi boshlig‘ining so‘zlariga ko‘ra, Rossiya gibrid hujumlar orqali NATOni qo‘zg‘atish va uning reaksiya tezligini sinashni ko‘zlaydi. Bu hujumlarning o‘ziga xos jihatlaridan biri — ularni aniq tarzda klassifikatsiya qilish ko‘pincha imkonsiz. «Bu — usul. Va bu usulning maqsadi — ishonchsizlik urug‘ini sochish, qo‘rquv uyg‘otish, zarar yetkazish, josuslik qilish, sinash, — dedi Aleksander Zollfrank. — Bu qo‘rqitish orqali urush olib borishdir».

U o‘z pozitsiyasini Rossiya qo‘shinlarining salohiyati bilan asosladi. Baho berilishicha, Ukrainadagi yo‘qotishlarga qaramay, RF harbiy-havo kuchlari jangovar qudratni saqlab qolgan, yadroviy va raketa qo‘shinlari umuman olganda foydalanilmagan holatda qolmoqda. Quruqlik qo‘shinlari yo‘qotishlarga uchragan, ammo RFdagi jangovar tanklar soni shunchalik ko‘pki, cheklangan hujumni hoziroq tasavvur qilish mumkin. Bundan tashqari, Rossiya o‘z qo‘shinlari sonini 1,5 million askar va ofitsergacha oshirish niyatida.

Aleksander Zollfrank ta’kidlashicha, deyarli 20 yildan buyon Moskva Yevropada xavfsizlik arxitekturasini o‘zgartirishga qaratilgan strategik yo‘nalishni olib bormoqda va Ukrainaga qarshi urushdagi katta yo‘qotishlarga qaramay, shu yo‘lda davom etmoqda. NATO bunga faqat «aniq qizil chiziqlar» o‘rnatish va yaxshi tayyorgarlik hisobiga raqibni tiyib turish orqali qarshi tura oladi, deb hisoblaydi Bundesver generali.