Qoʻshimcha funksionallar
-
Tungi ko‘rinish
«Urush tugaguncha» - Ulyanovskda mobil internet cheklanadi
Ulyanovsk va shu hududdagi bir nechta shaharlarda Rossiyaning Ukrainaga qarshi urushi yakunlanguncha mobil internet o‘chiriladi, deb xabar berdi mahalliy hukumat.
Ulyanovsk shahridan ayrim mikrohududlar va Ulyanovsk viloyatining boshqa aholi yashaydigan punktlarida ukrain dronlari hujumi xavfi sabab joriy etilgan mobil internet cheklovlari Rossiyaning Ukrainaga qarshi urushi tugaguncha saqlanadi, deb maxsus matbuot anjumanida mahalliy hokimiyat vakillari ma’lum qildi, deya xabar beradi “Ulpravda” nashri 8 noyabr kuni.
«Cheklovlar hududiga ayrim turar joy kvartallari, ijtimoiy obektlar va ofis binolari ham kirdi. Davlat sirini saqlash nuqtai nazaridan o‘chirish zonalarining aniq xaritalari e’lon qilinmaydi», — deb yozadi jurnalistlar. Cheklovlar Ukrainadagi urush tugaguncha davom etadi, agar «federal markaz tomonidan boshqa qarorlar qabul qilinmasa».
Shu bilan birga, mobil internet cheklangan hududlarda «oq ro‘yxat»dan bo‘lgan saytlar ishlashda davom etadi. U ro‘yxatga «Gosuslugi», «Yandeks» servislari, «VKontakte» va «Odnoklassniki» ijtimoiy tarmoqlari, Ozon va Wildberries marketpleyslari, «Mir» to‘lov tizimi va boshqalar kiritilgan. Cheklovlar zonasida istiqomat qiluvchilarga o‘z mobil operatorlariga murojaat qilib, «katta internet-trafik paketi kiritilmagan, ko‘proq mos tarifga» o‘tish tavsiya etildi.
Hokimiyat cheklovlar «geografik jihatdan tanlab qo‘llanishi»ni va «butun mintaqa bo‘yicha emas, balki maxsus maqsadli muhim obektlar atrofida amalga oshirilishini» ta’kidladi.
10 noyabr kuni «Vedomosti» gazetasi va «Interfaks» agentligi manbalariga tayangan holda yozishicha, Rossiya operatorlari «fuqarolar va davlatni yuzaga kelayotgan xavfsizlik tahdidlaridan himoya qilish uchun zarur bo‘lsa» FSB talabi bilan aloqa xizmatlarini to‘xtatishi shart bo‘ladi.
«Aloqa to‘g‘risida»gi federal qonunning 44- va 46-moddalariga tegishli o‘zgartishlarni nazarda tutuvchi qonun loyihasi RF Raqamli rivojlanish vazirligi tomonidan ishlab chiqildi, undan so‘ng hukumatning qonun loyihalari faoliyati bo‘yicha komissiyasi uni Davlat Dumaga kiritishni ma’qulladi, deb xabar qiladi OAV.
Qonun loyihasi, shuningdek, FSB organlaridan so‘rov kelib tushgan hollarda «ko‘chma radiotelefon aloqasi xizmatlarini ko‘rsatish to‘g‘risidagi shartnomalardan kelib chiqadigan majburiyatlarni yetarlicha bajarmaganlik uchun» aloqa operatorlarini javobgarlikdan ozod qilishni ham nazarda tutadi.
