«MIB binosini ta’mirlamoqchi edim» – pora bilan ushlangan MIB Farg‘ona tuman bo‘limi boshlig‘i ozodlikdan mahrum qilindi

Farg‘onada pora bilan ushlangan MIB mansabdori jinoiy jazoga tortildi. Kun.uz sud hukmi bilan tanishdi.

Sud hujjatida keltirilishicha, 39 yoshli U.Ya. 2023 yil fevral oyidan MIB Farg‘ona tuman bo‘limi boshlig‘i lavozimida ishlab kelgan. U o‘z xizmat vakolatidan foydalangan holda, bo‘ysunuvidagi davlat ijrochisi ish yurituvida bo‘lgan fuqarolik ishlari bo‘yicha sudning ijro varaqasi bo‘yicha javobgarlarni ushbu tumandagi xonadondan majburiy tartibda ko‘chirish yuzasidan ijro harakatlarini yakunlab berish evaziga 2 ming dollar talab qilgan.

U.Ya. 2025 yil 3 iyun kuni talab qilingan pul mablag‘idan 1200 dollarini pora sifatida olgan. 11 iyun kuni esa qolgan 800 dollarini olgan vaqtida Davlat xavfsizlik xizmati va Bosh prokuratura huzuridagi departament hamkorligida o‘tkazilgan tezkor tadbirda ushlangan.

Sudlanuvchi sudda aybiga qisman iqror bo‘lgan.

“2025 yil aprel oyida tanishim o‘zi bilan birga A.X.ni xizmat xonamga olib keldi. A.X. MIB Farg‘ona tuman bo‘limi ish yurituvida A.Q.ga tegishli bo‘lgan Farg‘ona tumani, Xonqiz mahallasidagi uyda yashayotgan fuqarolarni uydan chiqarish to‘g‘risida ijro ishi mavjudligini bildirdi. Ushbu ishni hal qilib berishini so‘radi va A.Q. xizmat bo‘lsa qilishini aytdi. Men qonuniy tarafdan yordam qilib, tezlashtirib berishimni aytdim va ular xizmat xonamdan chiqib ketishdi.

1 oydan so‘ng A.Q. MIB Farg‘ona tumani bo‘limi binosiga kelib, tezroq unga tegishli bo‘lgan uyni bo‘shatib berishini so‘radi. Unga ijro harakatlari o‘tkazilishini aytib, ketkazib yubordim. Ijrochi uyni bo‘shatish bo‘yicha ijro 2025 yil taxminan 3-4 iyun kunlariga tayyorlanganini aytdi.

Shundan so‘ng men va 5 nafar ijrochi xodim ushbu uyda noqonuniy yashayotgan 6 nafar fuqaroni ko‘chirdik. Sud qarori ijrosini ta’minlaganimizdan so‘ng arizachi MIB binosini ta’mirlashga homiy bo‘lish maqsadida 2 000 dollar berishini aytdi. Undan 1 200 dollar miqdoridagi pulni oldim. Ushbu pullarga Farg‘ona tuman MIB binosini rekonstruksiya qilmoqchi bo‘lgandim”, degan u o‘z ko‘rsatmasida.

U.Ya. qilgan ishidan pushaymonligini aytib, suddan yengillik so‘ragan.

JIB Uchko‘prik tuman sudining hukmi bilan U.Ya. Jinoyat kodeksining 210-moddasi (pora olish) 1-qismi bilan aybdor deb topilgan. Unga 3 yil huquqni muhofaza qiluvchi organlarda ishlash huquqidan mahrum qilgan holda 3 yil muddatga ozodlikdan mahrum qilish jazosi tayinlangan. Jazoni manzil koloniyalarda o‘tash belgilangan. 

U.Ya.ning tezkor tadbirda pora bilan qo‘lga olingani oldinroq xabar qilingandi.