2022 yildan beri O‘zbekistonda yollanish moddasi bilan 338 ta jinoyat ishi ochildi

O‘zbekiston fuqarolarining xorijdagi harbiy harakatlarda qatnashishi yuzasidan 2022 yildan beri O‘zbekistonda 338 ta jinoyat ishi qo‘zg‘atilgan. Bu haqda Davlat xavfsizlik xizmati ma’lum qildi.

DXXning “Uzoqdan izlangan baxt” nomli hujjatli filmida aytilishicha, Jinoyat kodeksining 154-moddasi (Yollanish) bilan qo‘zg‘atilgan jinoyat ishlari soni:

• 2022 yilda 19 ta;
• 2023 yilda 68 ta;
• 2024 yilda 112 ta;
• 2025 yilda 139 tani tashkil etgan.

“Ushbu raqamlarning o‘sishda davom etayotgani bizdan yanada ogoh bo‘lishni talab etadi. Fuqarolarimizdan turli kimsalar, guruhlar manfaatlari yo‘lida dunyoning turli nuqtalarida sodir bo‘layotgan qurolli to‘qnashuvlar ishtirokchisiga aylanib qolmaslik uchun har xil aldovlar, targ‘ibot harakatlariga ishonib qolmaslik va qonunchilik talablariga rioya qilishni so‘rab qolamiz”, – dedi DXX Tergov boshqarmasi tergovchisi Bekzod Qobulov.

Hujjatli filmda Rossiya–Ukraina urushi va Suriyadagi harbiy harakatlarda qatnashgan o‘zbekistonliklarning hikoyalari keltirilgan.

“Ayrim shaxslar moddiy manfaatdorlik evaziga yurtimizdan tashqarida bo‘lgan tanishlari va boshqa fuqarolarni aldov yo‘li bilan nizoli hududlarga jo‘natish bilan shug‘ullanib kelgan. O‘z yurtdoshlari qoni evaziga yaxshigina boylik to‘plashga uringan nokaslar ham bor” , – deyiladi filmda.

Ma’lumot uchun, Jinoyat kodeksining 154-moddasiga asosan, O‘zbekiston fuqarosining o‘zga davlat hududida qurolli to‘qnashuvlarda qatnashish uchun yollanishi – 5 yildan 10 yilgacha ozodlikdan mahrum etish bilan jazolanadi.