Фронтда Россия аскарларига мотоциклда озиқ-овқат етказиб берган ўзбекистонлик йигит озодликдан маҳрум қилинди

Россия армиясига ёлланган ўзбекистонлик йигит жиноий жазога тортилди. Kun.uz суд ҳукми билан танишди.

Суд ҳужжатида келтирилишича, 2001 йилда Фарғона туманида туғилган А.Қ. ишлаб пул топиш мақсадида 2022 йил 3 феврал куни Россиянинг Москва шаҳрига борган. У шаҳарнинг Люберце мавзесидаги савдо мажмуаларида тозаловчи бўлиб ишлай бошлаган. 2022 йил сентябр ойида наркожиноятда айбланиб, қўлга олинган ва 7 йил муддатга озодликдан маҳрум қилинган.

Шу тариқа А.Қ. Екатеринбург шаҳридаги жазони ижро этиш муассасасида жазо муддатини ўтай бошлаган. 2024 йил ноябр ойида у қамоқхона раҳбариятининг Россия армияси сафида Украинага қарши урушда иштирок этиш таклифига розилик билдирган. Бунинг учун унга қамоқдан озод қилиш ҳамда Россия фуқаролигини бериш ваъда қилинган.

А.Қ. 2024 йил ноябр ойи ўрталарида Россия фуқаролигини олиш учун ариза топширган ҳамда ушбу давлат Қуролли кучлари билан шартнома тузган. 2024 йил 24 ноябр куни унга Россия фуқаролик паспорти берилган. 2024 йил 27 ноябр куни эса у 21 кунлик дастлабки ҳарбий тайёргарликдан ўтиш учун Донецк ҳудудига жўнаб кетган.

Дастлабки ҳарбий тайёргарликдан сўнг А.Қ. Донецкнинг Горловка шаҳрига бориб, бу ерда махсус тайёрланган шахтага жойлашган. Сўнгра уруш майдонидаги Россия аскарларига мотоциклда озиқ-овқат маҳсулотларини етказиб бериш вазифасини бажаришга киришган.

А.Қ. судда айбига тўлиқ иқрорлик билдирган ҳамда қамоқхонадаги қийноқ ва қўрқитувлардан сўнг Россия армиясига ёлланишга рози бўлганини айтган.

“Жазони ижро этиш муассасаси раҳбари кўплаб маҳкумларни чақиртириб, умумий тарзда Россия Қуролли кучлари таркибига қўшилиш ҳамда Украинага қарши урушга бориш таклифини билдирди. Бунинг учун қамоқдан озод қилишни ва Россия фуқаролигини беришни ваъда қилди. Бу таклифни рад этдим. 2024 йил август ойида ишга ўз вақтида бормаганим сабабли 15 кун карцерга жойлаштиришди. Карцердан чиқиб, 2 кун умумий тартибга ўтдим. Бироқ яна карцерга жойлаштиришди ва шундан кейин 3 ой давомида ўша ерда ўтирдим.

2024 йил ноябр ойида муассаса бошлиғи чақириб, Россия Қуролли кучлари билан шартнома тузишни таклиф қилди. Агар ушбу таклифни рад этсам жазо муддатимга яна 10 йил қўшилишини айтди. Шу сабабли унинг таклифига мажбуран рози бўлдим.

Сўнгра фуқароликка ариза топширдим ва Россия Қуролли кучлари билан шартнома туздим. Дастлабки ҳарбий тайёргарлик Донецкдаги полигонда бўлиб ўтди. 2024 йил декабрда Горловкадаги ҳарбий хизматчилар турар жойига олиб боришди. Бу ерда 4-5 кун бўлиб, сўнгра ушбу шаҳар чеккасидаги кўмир кони шахтасига бориб жойлашдим.

Ушбу шахтада истиқомат қилиб, мотоциклда ҳарбий хизматчиларга озиқ-овқат маҳсулотларини етказиб бериш вазифасини бажардим. Шу тариқа 8 ой давомида ҳарбий хизматни ўтадим. Бу орада 2 марта қочишга ҳаракат қилдим, бироқ ушлаб олишди”, деган йигит суддаги кўрсатмасида.

А.Қ. Россия аскарларига озиқ-овқат ташиб юрганида Украина дронлари ҳужумига учраган. У осколка тегиши оқибатида чап қўли ва чап оёғидан яраланган.

Шундан сўнг А.Қ. 2025 йил август ойи ўрталарида Донецкдан қочиб, 18 август куни Москва шаҳрига етиб борган. Сўнгра Москва шаҳридаги Ўзбекистон консулхонасига мурожаат қилган ва 2025 йил 28 август куни ватанга қайтиш гувоҳномаси орқали Фарғона шаҳрига қайтиб келган.

ЖИБ Фарғона туман судининг 2025 йил 17 октябрдаги ҳукми билан А.Қ. Жиноят кодексининг 154-моддаси (ёлланиш) 1-қисмида назарда тутилган жиноятни содир қилганликда айбли деб топилган. Унга 3 йил озодликдан маҳрум қилиш жазоси тайинланган. Жазони умумий тартибли колонияларда ўташ белгиланган.

Аввалроқ Россия армиясига ёлланиб, Курск вилоятидаги жангларда иштирок этган ўзбекистонлик шахс 3 йил муддатга озодликдан маҳрум қилинганди.