Reuters: Kellog Ukraina bo‘yicha maxsus vakil lavozimidan ketadi

AQSh prezidenti Donald Trampning Ukraina bo‘yicha maxsus vakili Kit Kellog vakolat muddati yakunlanishi munosabati bilan 2026 yil yanvar oyida ma’muriyatni tark etadi. Reuters agentligi chorshanba, 19 noyabr kuni to‘rt manbaga tayanib yozishicha, Kellog iste’foga chiqish niyati haqida o‘zining ishonchli shaxslariga ma’lum qilgan.

Qayd etilishicha, iste’fodagi general-leytenantning ketishi Kiyev uchun yo‘qotish bo‘ladi, chunki u Tramp ma’muriyati tarkibida Ukraina tarafdori sifatida eng muhim shaxslardan biri hisoblangan. Kellog Ukraina fuqarolik infratuzilmasiga qaratilgan Rossiya hujumlarini ma’muriyatning boshqa vakillariga qaraganda keskinroq qoralagan.

OAV xabarlariga ko‘ra, Kellog AQSh prezidentining yana bir maxsus vakili Stiv Uitkoff bilan nizoga borgan. Uitkoff Ukraina tomonidan hududiy imtiyozlarni ham nazarda tutuvchi yangi tinchlik rejasini ilgari surmoqda. Prezidentning maxsus vakili — vakolat muddati 360 kundan oshmaydigan vaqtinchalik lavozim bo‘lib, bu muddat Senat tomonidan uzaytirilishi mumkin.

Oradan bir kun oldin Reuters va qator g‘arb OAV Vashington Ukrainadan mamlakat sharqidagi ba’zi hududlardan voz kechishni, qurolli kuchlar sonini qisqartirishni va ayrim turdagi qurollardan bosh tortishni talab qilayotgani haqida xabar berdi. Bu talablar Rossiyaning Ukrainaga qarshi urushiga barham berish bo‘yicha Tramp ma’muriyatining yangi rejasida bayon etilgan.

Reuters suhbatdoshlarining ta’kidlashicha, Oq uy Ukraina prezidenti Volodimir Zelenskiyga Vashington tomonidan ishlab chiqilgan, 28 banddan iborat rejani Kiyev qabul qilishi kerakligini tushuntirgan. Avvalroq xabar berilganidek, Tramp ma’muriyati loyihasida to‘rtta asosiy yo‘nalish ajratib ko‘rsatilgan: Ukrainada tinchlik, xavfsizlik kafolatlari, Yevropada xavfsizlik va Vashingtonning Moskva hamda Kiyev bilan kelgusi munosabatlari.