Toshkentda xavfli harakatlangan Cobalt o‘q uzib to‘xtatildi

Toshkent shahrida ichki ishlar organlari xodimlarining to‘xtash haqidagi qonuniy talabiga bo‘ysunmasdan xavfli harakatlangan Cobalt o‘q uzish orqali to‘xtatildi. Bu haqda poytaxt IIBB matbuot xizmati xabar berdi.

Ijtimoiy tarmoqlarda tarqalgan videolarda Cobalt rusumli avtomashina bir nechta transport vositalariga shikast yetkazib, qochib ketganini ko‘rish mumkin. Voqea 11 iyun kuni taxminan soat 21:30 da sodir bo‘lgan, avtomobilni ruhiy-asab kasalliklari shifoxonasida ro‘yxatda turuvchi 44 yoshli R.Y. boshqargan.

Qayd etilishicha, u o‘z boshqaruvidagi Cobalt’da Yakkasaroy tumani Shota Rustaveli ko‘chasi bo‘ylab yo‘l harakati qoidalarini buzgan holda, o‘zgalar hayotini xavf ostiga qo‘yib harakatlangan. Hududda xizmat olib borayotgan IIO xodimlarining to‘xtash haqidagi qonuniy talabiga bo‘ysunmasdan, harakatni davom ettirib, bir nechta transport vositalariga texnik shikast yetkazgan.

Ko‘rilgan tezkor chora-tadbirlar natijasida ushbu fuqaro tomonidan boshqa fuqarolarga zarar yetkazilishining oldini olish maqsadida IIO xodimlari tomonidan tabel qurolidan foydalanilib, ogohlantirishdan so‘ng avtomashina g‘ildiragiga o‘q uzish orqali to‘xtatilgan va keyingi noqonuniy harakatlariga chek qo‘yilgan.

Holat yuzasidan tergovga qadar tekshiruv o‘tkazilmoqda. Holat Toshkent shahar IIBB boshlig‘i tomonidan nazoratga olingan.