Toshkentda havo ifloslanishini aniqlash uchun maxsus mobil laboratoriyalar jalb etildi

Hozirda Toshkent shahrida atmosfera havosi holati 24 soat davomida doimiy monitoring qilinib borilmoqda. Bu ishlar Ekologiya va iqlim o‘zgarishi milliy qo‘mitasi huzuridagi «Atrof-muhitni muhofaza qilish sohasida ixtisoslashgan analitik nazorat markazi» tomonidan tashkil etilgan mobil ekologik laboratoriyalar yordamida amalga oshirilmoqda.

Ma’lumotga ko‘ra, ushbu laboratoriyalar poytaxtning barcha tumanlarida havo ifloslanish darajasini o‘rganib, zararli moddalar va mayda dispersli zarrachalar miqdorini joylarda aniqlab bormoqda. Shunday laboratoriyalardan biri hozirgi kunda Toshkent shahar Yunusobod tumanidagi «Turkiston» metro bekati atrofidagi hududda havo holatini kuzatmoqda.

Ekologiya qo‘mitasi tomonidan havo sifatini yaxshilash maqsadida tezkor shtab tashkil etilgan. Tegishli idora va tashkilotlar bilan hamkorlikda poytaxtdagi ekologik vaziyatni yaxshilash uchun zarur chora-tadbirlar amalga oshirilmoqda.

Mobil laboratoriyalar tomonidan aniqlanayotgan ifloslanish manbalari haqidagi ma’lumotlar tegishli tashkilotlarga yuborilmoqda va ular tomonidan belgilangan tartibda qonunchilikka muvofiq choralar ko‘rilmoqda.

Ekologiya va iqlim o‘zgarishi milliy qo‘mitasi aholidan rasmiy axborot manbalarini kuzatib borishni, havo ifloslanishi yuqori bo‘lgan kunlarda esa ochiq havodagi faoliyatni qisqartirish va sog‘liqni asrash bo‘yicha tavsiyalarga amal qilishni so‘ramoqda.