Oliy ta’limda kontrakt to‘lovi muddatlari yangilandi

Yangilangan tartibga ko‘ra, oliy ta’lim tashkilotlarida kontrakt asosida o‘qish uchun to‘lov quyidagi muddatlarda amalga oshiriladi:

• to‘lov miqdorining kamida 25 foizi – abituriyentlar uchun 15 sentabrgacha, yuqori bosqich talabalari uchun 1 oktyabrgacha yoki OTM rektori tomonidan uzaytiriladigan muddatgacha;
• to‘lov miqdorining kamida 50 foizi – 1 yanvargacha, 75 foizi – 1 martgacha, 100 foizi – 1 maygacha yoki OTM rektori tomonidan uzaytiriladigan muddatgacha to‘lanadi.

Shu bilan birga, Davlat komissiyasi ushbu to‘lov muddatlarini uzaytirish vakolatiga ega ekani belgilandi.

Shuningdek, kontraktdan tushgan mablag‘lar xorijiy oliy ta’lim tashkilotlarida istiqbolli yosh pedagog va ilmiy kadrlarning malakasini oshirish va stajirovka o‘tashiga sarflanishi mumkin bo‘ladi.

Oliy ta’lim tashkilotlari o‘z talabalarini ijtimoiy muhofaza qilish doirasida bir yilda bir talabaga mehnatga haq to‘lash eng kam miqdorining 6 barobarigacha moddiy yordam ko‘rsatish huquqiga ega bo‘ladi.