Qurilish maydonlarida havoni ifloslantirgan tashkilotlar faoliyati to‘xtatilishi mumkin

Ma’lumotga ko‘ra, amaldagi qonunchilikka muvofiq barcha qurilish tashkilotlari quyidagi talablarni bajarishga majbur:

— qurilish jarayonida chang va qum zarrachalarining havoga ko‘tarilishiga yo‘l qo‘ymaslik;
— qurilish maydoniga kirib-chiqish yo‘laklarida osma yomg‘irlatkich va suv purkagichlar o‘rnatish;
— avtotransport vositalari g‘ildiraklarini majburiy tarzda yuvish uchun maxsus yuvish shoxobchasini tashkil etish;
— chang tarqalishining oldini olish maqsadida qurilish maydonini to‘siqlar, himoya qoplamalari va maxsus materiallar bilan jihozlash.

Ekologiya va iqlim o‘zgarishi milliy qo‘mitasi mazkur talablarga rioya etmaslik holatlarida Ma’muriy javobgarlik to‘g‘risidagi kodeks normalariga binoan jarima va boshqa ma’muriy choralar qo‘llanishi mumkinligini eslatmoqda.

Qonunbuzarlik jiddiy tus olgan taqdirda, qurilish tashkiloti faoliyati 10 ish kunigacha to‘xtatilishi yoki belgilangan tartibda butunlay tugatilishi ham mumkin.