Bangladeshda O‘zbekistonning yangi elchisi ishonch yorliqlarini topshirdi

Tantanali marosimdan so‘ng bo‘lib o‘tgan suhbat chog‘ida O‘zbekiston va Bangladesh o‘rtasidagi siyosiy, savdo-iqtisodiy, investitsiyaviy, madaniy-gumanitar va boshqa sohalardagi munosabatlarning bugungi holati hamda ularni rivojlantirish istiqbollari muhokama qilindi.

Muhammad Shahobuddin O‘zbekistonni Bangladeshning Markaziy Osiyodagi asosiy mintaqaviy sherigi va ishonchli do‘sti deb atadi. U so‘nggi yillarda prezident Shavkat Mirziyoyev rahbarligida hayotning barcha jabhalarida amalga oshirilayotgan jadal islohotlar va tashabbuslar tufayli mamlakatning xalqaro maydondagi obro‘-e’tibori yuksalib borayotganini alohida ta’kidladi.

Uchrashuvda Bangladesh hukumatining mamlakatlar o‘rtasidagi savdo-iqtisodiy hamkorlikni rivojlantirishga alohida ahamiyat qaratayotgani qayd etildi. To‘qimachilik, farmatsevtika va charm sanoati kabi sohalarda sheriklik uchun salmoqli salohiyat mavjudligi ta’kidlandi. Bangladesh tomoni ushbu yo‘nalishlarda tajriba almashish va yangi loyihalarni birgalikda amalga oshirishga tayyorligini bildirdi.

Muloqot chog‘ida madaniy-gumanitar sohada, jumladan, turizm va oliy ta’lim yo‘nalishlaridagi sheriklikni rivojlantirish masalalariga ham alohida e’tibor qaratildi.

O‘zbekiston va Bangladesh o‘rtasida diplomatik munosabatlar 1992 yil 15 oktyabrda o‘rnatilgan. O‘zbekistonning yangi elchisi Sardor Rustamboyev 2024 yil yanvar oyida Dehliga kelgan bo‘lib, ungacha mamlakatning Fransiya va Portugaliyadagi diplomatik missiyasiga rahbarlik qilgan.