Adliya vazirligi Soliq hisoboti shakllariga o‘zgartirishlarni davlat ro‘yxatidan o‘tkazdi (ro‘yxat raqami 3221-8, 2025 yil 26 noyabr). Mazkur hujjat ayrim qonunchilik hujjatlari qabul qilinganligi munosabati bilan soliq hisoboti shakllarini to‘ldirish tartibini takomillashtirishga qaratilgan.
Yangi tartibga muvofiq, yillik aylanmasi 1 milliard so‘mgacha bo‘lgan yakka tartibdagi tadbirkorlar (YaTT) va o‘zini o‘zi band qilgan shaxslar uchun aylanmadan olinadigan soliq stavkasi 1 foiz miqdorida belgilangan. Shu munosabat bilan ushbu toifadagi soliq to‘lovchilar uchun hisobotning soddalashtirilgan shakli joriy etilmoqda.
Shuningdek, tadbirkorlar tomonidan umumiy quvvati 100 kVtgacha bo‘lgan qayta tiklanuvchi energiya manbalaridan foydalanib, umumiy tarmoqqa elektr energiyasi realizatsiya qilishdan olingan foyda uchun nol soliq stavkasi qo‘llanadi. Yangilangan soliq hisoboti shakllarida mazkur imtiyozni inobatga oluvchi alohida qatori va maydonlari nazarda tutilmoqda.
Bundan tashqari, xalq deputatlari kengashlari ijara to‘lovining eng kam stavkalariga nisbatan tuman va shaharlar kesimida ularning iqtisodiy rivojlanishi darajasidan kelib chiqib 2,0 gacha oshiruvchi koeffitsiyent joriy etishga haqli ekanligi inobatga olingan. Shu bois jismoniy shaxslar tomonidan mol-mulk ijarasi uchun stavkani alohida to‘ldirish talabi soliq hisoboti shakllaridan chiqarib tashlanmoqda.
Mazkur o‘zgartishlar 2026 yil 1 yanvardan amalga kiritilib, tadbirkorlar va soliq to‘lovchilar uchun hisobot berish jarayonini soddalashtirish hamda amaldagi qonunchilikka moslashtirishga xizmat qiladi.
